特稿：休會齊合唱 復會盼啱key

微信掃一掃

立法會噚日舉行今個立法年度最後一次午間音樂會，今次請咗青年音樂訓練基金以中西樂器合奏《江河水》，當然唔少得精通多種樂器嘅經民聯主席盧偉國啦，佢今次就用色士風同學生jam歌。

反對派亦好難得同建制派唱埋同一支歌，盧偉國同公民黨陳淑莊、「新民主同盟」范國威、立法會秘書長陳維安一齊合唱《萬水千山縱橫》，而醫學界陳沛然同「專業議政」葉建源就打鼓伴奏。

之但係兩邊幾時可以喺議會入面唱埋同一台戲呢？立法會主席梁君彥就話，好認同議員都係為香港人做事，雖然中西樂玩嘅樂器唔同，好似唔啱key咁，但最終都可以夾到首歌出嚟，希望啲議員可以放低今年爭拗，10月復會後合作會好啲。

立法會前主席曾鈺成同民政事務局原局長曾德成兩兄弟亦都有嚟湊熱鬧，最後全場仲大合唱《Auld Lang Syne（友誼萬歲）》??。 ■香港文匯報記者 鄭治祖

讀文匯報PDF版面