反對派一直煽動仇警，近日一幅所謂「警員埋伏草叢捉亂過馬路者」的照片在多個fb專頁流傳，「粗口教師」林慧思，及撐「獨」的沙田區議員陳國強等均出帖冷嘲熱諷。不過，有網民就踢爆幅相不但係去年嘅，而且相中人並非警員，而是食環署蟲鼠組的職員，走入草叢可能只是追查鼠蹤，有人更話幅相其實係澳門影嘅。不過，仇警上腦嘅人，梗係唔會覺得自己鬧錯啦，日後都係會繼續假嘢當真四圍唱，大家真係要小心啲嘞。
多個fb專頁近日流傳一幅相，相中係一個着制服嘅人蹲在草叢裡。雖然幅相冇頭冇尾，但有人就將警方近日嚴打亂過馬路一事拉埋嚟講，話係警員埋伏等捉亂過馬路嘅人喎。
屈警匿草叢捉亂過馬路
陳國強就喺自己fb上載咗呢幅相，仲發文話：「警察Operation！大家以為埋伏捉大賊！原來只係捉亂過馬路的婦嬬......男子漢！」一向仇警的林慧思亦如獲至寶，轉發咗陳國強個帖，但唔知點解佢篇文就話係「以為咩咁大陣仗，原來捉小販」。
成班仇警嘅「港獨」分子當然趁機批評警方。「Michael Fung」侮辱道：「自認男子漢大丈夫，做埋啲鼠竊狗偷行為， 匿喺草叢唔係為咗捉大賊，原來為咗捉啲呀（阿）公呀（阿）婆為貪方便不沿行人過路線橫過馬路。」「Wong Eric」就話：「香港警賊（察）攪（搞）到今時今日走向共和鬼鬼崇崇（祟祟），真的一句好仔莫當差，當差會×街。」
舊相重發 原來係澳門
不過，離開咗呢個同溫層，同一幅相喺其他fb專頁，就好快俾人踢爆，話幅相非但已經係舊年嘅事，相中人亦非警員。「Clarence Cheng」就指相中人的制服不似警員，而是像食環署制服，並說：「左圖食環蟲鼠組管工，毋須捉垃圾蟲，可能在花槽內檢查老鼠蹤跡。」
「Matthew Law」亦揶揄啲亂噏嘅人無常識：「食環署捉咩過馬路？咁警察又捉衣（伊）因（人）呀？幾個月前嘅相又拎出嚟人傳你又傳？千年蟲要買杜蟲藥呀！」
「Jay Cheung」更狠批：「用下（吓）個腦諗下（吓）都知假啦！香港有幾多班（斑）馬線？有幾多天橋？仲要吹到咩每個街頭角落（都有警員『埋伏』），信果（嗰）個個腦真係出左（咗）事！」
其實最爆嘅係，呢幅相並唔係喺香港影嘅，只要留意吓相片右邊個巴士站有一個綠色標誌，而個標誌就係「歡迎使用澳門通」，去過澳門嘅朋友都應該唔會陌生，就知道幅相根本就係澳門嘅相。
當然，跟車太貼搞到炒車喺網絡發達嘅今天真係好常見，但因為仇警而明屈絕對係別有用心，例如民主黨太古城區議員趙家賢話發生槍擊案出動反恐隊令居民唔舒服之類，睇怕都會陸續有來。 ■香港文匯報記者 陳川