■余德丞精神好轉，說話清晰。 資料圖片香港文匯報訊（記者 李思穎）28歲的余德丞（Dickson）於本月8日踢波期間突然不適昏迷入院，情況一度危殆令人擔心。Dickson最初留醫深切治療部，其後情況轉好轉到心臟科病房觀察，經過十多天治療後，Dickson昨日首度開腔向大家報平安，更感恩跨過鬼門關大步檻過，希望盡快出院同大家見面。
Dickson透過無綫官網向大家交代現時的身體狀況，並向各方人士致謝，他說話時很清晰響亮，證明精神狀態不錯，他說：「Hello，咁多位大家好！我係Dickson余德丞，我覺得真係好好彩，非常之感恩，非常之開心！今次可以大步檻過醒得返，再同大家講嘢，真係衷心多謝全香港每一位關心、問候、祝福同埋集氣的人，令到我能夠醒得返，真係衷心多謝各位。」
感激隊友做心肺復甦
Dickson更自爆心臟曾停頓一段頗長時間：「其實醒返之後先知道原來件事幾嚴重，因為昏迷的時候，個心都停咗一段幾長嘅時間，所以能夠起得返身，再同大家傾偈真係好好彩。這幾日裡面都慢慢康復，精神咗好多，講嘢都清楚咗，當然醫生都建議要留院多一段時間， check清楚身體係咪真係OK先可以出院。最後，真係好多謝瑪麗醫院上上下下咁多位醫護人員，得到佢哋悉心照顧，同埋幫我在關鍵時候做心肺復甦的足球隊隊友，仲有屋企人每日都嚟探望整嘢畀我食，仲有TVB上上下下咁多位好同事同咁多位傳媒朋友，無咗你哋一位都唔得，所以希望可以快些出院，同大家見面，有乜嘢新消息，再通知你哋，記住身體健康最緊要。」