梁振輝 香港資深出版人
波士（Boss）：輝仔、婷婷，啱啱個「project」你哋組人跟得幾貼，效果都幾好，成組人放番日有薪假喇！睇下你波士幾知情識趣同埋幾仁慈！
婷婷：波士咁「識do」，我哋會繼續努力㗎嘞！
輝仔：婷婷，下世都要搵番啲咁嘅波士至得嘞！
說罷，波士帶着興奮的心情走開了。
婷婷：唓，呢兩個禮拜，日日「OT」（overtime/超時）四五粒鐘，有幾日「通頂」都冇同佢計，而家補得嗰一日咁大把，就「晒」自己大慈大悲！
輝仔：佢梗係當咗自己係觀音菩薩定喇！
不旋踵，波士又走到二人跟前。
波士：補假嗰日，成組人上嚟我度！
婷婷：波士，嗰日係咪有喜慶呢？
波士：冇，咁啱嗰日「housewarming」（新居宴客），咪順便叫埋你哋上嚟囉！你哋上過我喺淺水灣嗰個單位㗎喇，得嗰二千呎，三個人連兩個工人點夠住呀，咪喺半山搵間「house」（獨立屋）囉，細細哋連個花園仔都有四千呎，住着先喇！嗱，老老實實，你哋唔好諗住買幾支靚紅酒上嚟賀我呀吓，「帶梳蕉」（兩手空空到訪）就得嘞！
婷婷（心想）：咁Q好死，肯定有下文！
波士：講真，唔係呢排飲「lafite」（法國波爾多拉菲紅酒）飲到嘔，我會唔叫你哋買上嚟咩！
說罷，波士離開了公司。
輝仔：使唔使嘢嘢都兜個圈嚟「晒命」呀！
「Housewarming」當日，波士家中好不熱鬧。
婷婷：波士，間屋好大，啲裝修又好豪噃！
波士：婷婷，實不相瞞，今年時我都不知幾淒涼，揼成千個裝修唔在講，稅又要交成千萬，真係賺得多冇好結果，所以好多時我會好羨慕你哋㗎！
婷婷（心想）：「晒料」吖你，因住飲水哽嚫呀！
輝仔（在婷婷身旁，心想）：講埋晒啲咁嘅風涼話，拖佢出去斬喇！哼，至少都要打佢一身！
波士：咁人齊，等我囡囡彈首貝多芬畀大家聽吓。佢學咗成兩年，都係去到八級，算失禮嘞！
婷婷（在輝仔耳邊說）：咁叫失禮？咁叫「騷quali」！你死好命，有個咁叻個女！
輝仔（在婷婷耳邊說）：話又唔係咁講，冇料「騷」個屁呀！我個女如果有佢咁叻，我由西環「晒」到去柴灣，再由柴灣「晒」到去對面海㖭呀！
波士：今日咁大棚人；輝仔，由你操刀，影張「全家福」（大合照）發上「Facebook」！大家聽住，全人類出晒去花園，影埋間屋先至夠氣勢嘅！
婷婷（心想）：佢唔會嘥任何一個「演嘢」嘅機會！
「曬」，俗作「晒」，指在陽光下曝乾或取暖。「晒」被定為「曬」的簡體字。台灣把「晒」定為正體字，「曬」則定為其異體字。粵語中，「晒」與「曬」並用，前者則較為常用。
廣東人喜歡在陽光下「晒」東西，如棉被、果皮、海味。「晒」時，人們把所有東西「攤開」，這樣「晒」就有了展示全部的意思。在用法上，「晒」可表示「全」（如出晒去玩）、「完」（如食晒個橙、睇晒套戲）、「了」（如打攪晒/滾攪晒）的意思，也可表示「展示」（如晒命、晒料）。
值得一提，很多人把「晒」誤寫成其近形字「哂」，反之亦然。查此字讀「診」（筆者不接受因多人誤讀成「晒」而把它看成異讀），常見的相關詞彙有：「哂納」（笑納）；不值一哂（比喻不當成一回事，與「得啖笑」、不值一提意近）。
迷信的人認為，「命」指貧富、壽數和一切遭遇，而這些都是生來就注定的了。「晒命」（show off）可算是人性的缺點--炫耀、自誇、臭美、往自己臉上貼金，即向人展示或誇耀自己或家人比人強的特質，集中於以下四方面：財富、成就、相貌、運程，從而抬高自己，貶低他人。「晒命」的手法層出不窮，有有意無意的，有扮可憐的，務求凸顯自己或家人的優勢。
不要以為「晒命」的行為頂多令對方不滿或感到自悲，有時還會「晒」出個禍來的。比方，不值你「晒命」的人可能會揍你一頓；如「晒命」的是身家財富，這不就是間接令自己和家人成為歹徒搶劫、綁架或謀殺的目標嗎？
有人認為「晒命」含「吹噓」成分，即當中涉及編造優點、長處，其實不然。「吹噓」與「晒命」不可混為一談，你可以對此手法不滿，但無可否認「晒命」中的元素並無半點虛假。
廣東人說人「有料」，就是指他有「資歷」（qualification），引申其能力高、條件好、資本厚等。由於愛「晒命」的人，「乜都晒一餐」（ 事無大小也拿出來誇耀一番），漸漸地有人就用「晒料/晒嘢」作為自炫的總稱了。
老一輩除了用「晒命」去形容那類人，還會說他們「演嘢」。有位聲稱「正字正確」的出版人，指出「演」的本字是「衒」，且認為「演嘢」也含「吹噓」成分。查此字同「炫」，通過音變成「演」，所以「炫」是本字，那又何須用一個艱澀的字呢？由上世紀八十年代起，「演嘢」開始被遺忘；人們會用一個中英合璧的詞--「騷quali（騷哥利）」來形容那些向人展示實力的人，其中「騷」是「show」（展示）的音譯，「quali」是「qualification」的非正式縮寫。
有人天生「好命」，沒多或沒付出，也可當一世贏家，提供了他們無限「晒命」的機會。其實，沒這福氣的人也毋須羨慕或妒忌，正是：
各有前因莫羨人
自怨自艾是無補於事的，反而應該這麼想：
臨淵羨魚，不如退而結網
與其「認命」，不如「搏命」
結局總是由自己來寫的。須知道，部分「晒命」一族當中，不乏透過真正努力而有今日的得着。
【專欄簡體版】https://leoleung2016.wordpress.com/