■王梓軒好開心可以做Live Show。香港文匯報訊（記者 植植）王梓軒（Johnathan）日前出席《慢活音樂》活動，吸引近百樂迷出席。近日Johnathan忙於拍攝TVB劇集《機場特警》，連續數天通宵開工而令到聲音沙啞，幸得歌迷體諒並出席支持：「好開心可以做Live Show，因為好簡單咁唱歌又同Fans傾偈，因為近來音樂上演出係少咗，加上最新派咗新歌，可以睇下佢哋反應，今次個騷唱咗好多舊歌，好似我一個音樂回顧。」
他透露來年是入行十周年，亦計劃舉行演唱會：「出年就係我入行十周年，今次當係試下水溫，睇下歌迷有咩歌想聽咁。我真係有段長時間冇唱歌，因為拍劇時間真係好癲，但為咗出年我現在都要頂硬上，加強音樂方面的演出。」
Johnathan為準備今次「迷你音樂會」困難重重，犧牲宵夜時間綵排：「我近排又拍緊《機場特警》，又要宣傳《是咁的，法官閣下》新劇，根本冇時間同琴師綵排，我唯有半夜時間在TVB停車場練歌，希望夜半歌聲冇嚇親同劇手足啦！」