「千金一諾」贏馬，過終點嘅一刻，潘頓振臂歡呼，好似贏咗大賽一樣咁激動，鞍上人只係想證明自己批評利敬國係冇錯，上場利敬國只要掌握得好已可贏馬，練馬師借艇割禾亦用得非常巧妙，既然潘頓彈得利敬國，佢自有把握取勝，於是將「千金一諾」順水推舟配上潘頓，而且大家可互相證明一切，練馬師谷馬早已到位，上次輸騎師未能交出水準，潘頓睇得肉緊，火遮眼犯規亦作出批評，結果亦冇批評錯，確實抵潘頓牙擦一番。
講牙擦睇吓今周三蔡約翰可否締造歷史，因為「紅運戰士」及「鄉村瑰寶」再出動，假如兩駒又再贏馬，呢兩隻蔡廄馬經已喺同日賽事中第三次雙雙報捷，同廄兩隻馬喺兩次賽事一齊贏馬已屬相當難得，假如三度同晚勝出，將係一個紀錄。蔡神仙第三度刻意將「紅運戰士」及「鄉村瑰寶」編於同晚賽事上陣，睇嚟幕後係有決心締造歷史。「紅運戰士」在三班贏完兩場谷草一哩，升上二班面對嘅對手加強了不少，要順利三捷受到考驗極大，能否三連霸真係很難講。
不過「鄉村瑰寶」喺三班再跑谷草千二米，相信冇乜馬可阻止到佢三連霸，呢隻馬初出跑谷草一千米後上不及得第四名，據賽後有消息傳出，隻馬賽前曾經肚痛，雖然情況並不嚴重，最後經檢查後可以上陣，不過，這匹大超班馬竟輸俾「驫驫」及「威先生」，甚至乎係現處五班嘅「雷超」。雖然首戰未能一出即勝，但翌仗即贏谷草千二米，而上場跑三班賽，一樣以半力姿態取得連捷，據馬房手足講，隻馬實力起碼係二班材料，假如進度理想，係有能力躋身一班嘅短途好手行列，現時嘅評分只係跑三班賽，任隻馬喺三班賽點跑，就好似大人同細路仔跑咁，今仗只要無意外，應有再勝嘅本錢，可望順風順水取得三連霸。