早兩日雷神喺自己嘅面書公布，他將喺十一月十八日騎「旺蝦王」同「歡樂之光」出戰兩場二級賽馬會錦標，同一時間亦公布埋佢獲得蔡約翰入紙申請成為主帥，當然，呢個消息獲得證實後，亦即係講香港啲騎師未來日子搵食將會變得艱難。但話雖如此，今季睇到兩個馬房，佢哋所用嘅騎師似乎十分合拍，一個係大摩，韋達騎大摩嘅馬交得相當準，至於另一個就係田泰安，佢騎告東尼馬房嘅戰駒，亦係十分賣力，今季到目前為止，田泰安夥拍告東尼馬房嘅戰馬，經已有十場頭馬，相信即使雷神返港，田泰安亦會與告東尼保持一定嘅合作關係，畢竟雷神只係蔡廄嘅主帥，很多時候要外借唔方便。今次夜賽，田泰安又儼如告東尼主帥咁，「勁哥兒」、「勇敢傳說」及「萬事欣」全由佢策騎，周日下午，當田泰安跑步完畢，立即入東廄睇三駒，馬房領班阿排，安排呢三駒喺地堂俾田泰安過目，上述三駒，有頭馬交出並唔出奇，但到底邊隻最有信心則要大家自己猜度吓。不過有一個動態，就係田泰安周日睇完呢三駒後，未幾就立刻到丁冠豪馬房睇「創意寶」，入到丁冠豪馬房，倉主經已替「創意寶」上好馬鞍，並由副練陳志忠喺地堂踱步俾騎練觀察，兩人喺欄邊細聲傾講，似乎對呢匹老黃忠滿肚密圈。據一班馬房手足透露，呢匹老黃忠上場勝出後，狀態依然保持得相當理想，今次更得幸運之神眷顧，排埋個黃金一檔，屆時放出又可以叫糊了。