利敬國俾潘頓彈兼搶埋隻「千金一諾」騎，最後仲贏埋添，呢吓連鎖反應都咪話對呢位後生仔打擊唔大，好似馬會短途錦標隻「五十五十」咁，田泰安今季有「紅衣醒神」騎，「五十五十」本來已轉咗手由利敬國執韁，但跑過兩次表現麻麻哋，加上最近俾潘頓彈到一戙都冇，呢次又俾幕後飛起，特登搵老將巫斯義返嚟幫手，睇嚟利敬國真係冇運行，假如巫斯義今次幫呢隻馬跑入位置或者贏埋，下仗出戰香港短途錦標，利敬國都唔使旨意有得再騎番呢隻馬。
巫斯義因有隻「五十五十」跑，周日獲得客串牌照，人未到經已四周搵新知舊雨幫手，希望今周日多獲兩匹實力馬上陣，搵番多少水腳，方嘉柏一直跟巫斯義關係唔錯，交情由佢老竇建立至今，既然一場嚟到，點會冇馬搵佢騎，不過今次方仔交隻有難度嘅馬俾呢位老將，考一考佢騎技有冇生疏，呢隻就係「赤兔寶駒」。大家都知道呢隻馬有幾高質素，奈何本身有內閃毛病，是匹並非容易駕馭嘅馬，除首季在何良馬房由蘇兆輝贏千四米外，上季轉由方嘉柏接手，並轉由韋達贏谷草一哩，本身雖然是匹跑中距離較佳嘅馬，今次馬房突然安排隻馬出戰田草千二米。其實，同日之中，馬房可以安排呢隻馬跑千八米，畢竟呢個路程隻馬曾有上名紀錄，但方仔計過數，跑千二米短途會着數過跑千八米，起碼贏到級數，所以部署向短途一試，並由巫斯義操刀，屆時有十倍八倍分頭，不妨博一博。