【資料速遞】美麗傳承盡顯霸氣

2018-11-16

「美麗傳承」上季選馬王壓倒「巴基之星」當選，但好多馬迷都話呢匹上季五捷馬冇乜星味，不過「美麗傳承」今季就以行動證明俾各位睇，佢係如假包換嘅真馬王！今季呢匹摩廄六歲馬復出，立即力克上屆打吡冠軍「平海福星」再次捧走國際三級賽慶典盃，上場出戰國際二級賽沙田錦標千六米，又贏埋上屆打吡亞軍「星洲司令」，就算星味較佢濃郁嘅「巴基之星」，都要落後佢三個幾馬位，而升級版嘅「美麗傳承」，連埋上季的慶典盃、沙田錦標、香港一哩錦標、女皇銀禧紀念盃同冠軍一哩賽，總獎金唔單止突破四千四百萬，更係香港首匹七勝國際分級賽的良駒，「美麗傳承」星味原來好似紅酒咁、越來越濃。