呢個周日賽事最令人期待當然係睇雷神風采，呢位未來蔡廄主帥，雖然仲未出到主帥牌，但蔡神仙已急不及待，周日搵隻「旺蝦王」俾佢騎，呢隻未來蔡廄短途鎮倉寶，如果順利贏埋呢場短途二級賽，相信稍後香港短途錦標，應該冇乜對手可以威脅到佢。不過當大家注意力集中喺蔡�嘅時候，亦要吼住蔡神徒弟羅富全，因為呢位新紮練馬師，今次有隻「紅衣醒神」列陣，呢隻馬假假哋都係上屆香港短途錦標冠軍，呢季蔡約翰太多短途好手，加上羅富全練隻「紅衣優駿」成績唔錯，所以幕後將「紅衣醒神」拉埋俾佢訓練，話唔定今次徒弟殺師父馬都唔奇。
「紅衣醒神」贏唔贏到師父隻當起嘅「旺蝦王」仲係題外話，大家最緊要睇睇由佢親自訓練出來嘅「歡樂之光」，呢隻馬上場因為潘頓做唔到磅，由史卓豐客串一次，點知用開放頭跑嘅馬，史卓豐唔知係咪驚咗潘頓，竟然俾「馬克羅斯」放到，所以今次羅富全決定用雷神一試，睇吓今次隻「歡樂之光」可唔可以復仇。
現時羅富全得到唔少馬主信任，中上班次佳駟可以話唔少，今次「錶之寶寶」出戰第九場第二班千二米，賽前有段小插曲，可以加強大家捧呢隻馬嘅信心。話說上個禮拜六，「錶」系有隻初出馬「錶之皇者」，來自蘇保羅馬房，賽前殺聲震天，臨場只得三倍，點知由起步到過終點，「錶之皇者」毫無走勢，亦可以話一啲威脅力都冇，事後有關人等當然希望想知隻馬發生乜嘢事，最終經獸醫處檢查得出報告話乜事都冇，由於騎練搵唔到原因，幕後於是急急跟羅廄工作人員聯絡，問今周日隻「錶之寶寶」搵咗配搭未，言下之意唔想再用潘頓，羅富全自然醒水，話心目中人選屬意巴度，幕後聽完即表滿意接受，今次「錶之寶寶」用巴度出戰，大家不妨一捧。