■終於完騷，孫耀威可以同太太好好吃大餐。香港文匯報訊 孫耀威（Eric）前晚舉行演唱會尾場演出，Encore時，孫耀威笑言自己每次好似行到好遠，又拍戲又做生意，但又陰魂不散出返來。他說：「因為有一班歌迷在，你們的尖叫聲，下年再開演唱會好嗎？放心，出年唔會搞生意，拍完戲即會返來。台灣、內地開好唔好？多謝你們等我25年，唱歌時好多回憶，知你們等我好耐。」其間孫耀威忍不住再次落淚。
完騷後接受訪問時，談到於個唱兩度落淚，Eric說：「首場個唱已流眼淚，綵排有心理準備，當看見粉絲回想很多，出道到現在轉眼間廿幾年，感覺很特別。粉絲由小孩子到結婚後做媽媽，大家一起成長，好開心、感恩有這班粉絲。(是否明年於紅館開騷？)對紅館好像半放棄狀態，因為太難有檔期，當抽獎可能會獲得檔期，不過一直有入紙申請。」
孫耀威又表示不單止紅館，台灣小巨蛋都有申請，聽聞明年有機會，兩個地方都好想開，台灣是自己出道的地方，香港是自己的家。談到粉絲投訴他騷肌太少，他笑言原本打算唱《浪踏破》時騷肌，但自己興奮過度忘記。Eric說：「唔緊要，之後開騷一定露。等我再練到變鋼條身形，我成日想拍返本寫真集，人在不同時候記錄個樣覺得唔錯，以前後生推出過不同寫真集，依然可以出『冰鮮肉、老鮮肉』，可能會有市場。」