■徐濠縈指自己已經與女兒「小男朋友」見過面。香港文匯報訊 徐濠縈（阿徐）前晚出席時裝活動，提到最近有傳媒指其14歲囡囡陳康堤(包包)同「嫩版彭于晏」 拍拖，阿徐接受訪問時指自己已經與「小男朋友」見過面，又笑指女兒已經「有人認頭」。問幾時開始知道女兒拍拖？阿徐坦言也是最近才知道：「因為阿女同我每日都傾好多偈，不過冇諗過大家都咁快知！」阿徐坦言有見過女兒的男朋友幾次，老公陳奕迅就未見過。問到老公是否要有心理準備先見對方？阿徐表示：「佢OK，好開放，你睇佢個樣就知，超級開放，咁呢個時候係應該拍拖。」
由於阿徐一身綠色打扮，記者笑她開綠燈，她笑說：「係呀，咁佢已經唔係小學生，已經係中三，有自己喜歡的人好正常。（你對個男仔印象如何？）好似講別人唔係咁好。（報道話佢似彭于晏喎？）咁咪好靚仔？咁我見過佢真人，都靚仔。（包包係咪好有眼光？）我同個女都好有眼光，最緊要大家開心，大家要對她們高抬貴手，她們唔識，嗰日都唔知畀人拍，淨係話有人影住，以為係其他家長。（有冇叫佢小心啲？）一早叫佢小心，我意思係唔好着住校服畀人影，公眾地方要檢點些，其實都係正常社交活動，普通小情侶咁樣。」
問到會否覺得時間過得很快，轉眼囡囡就拍拖？她說：「朋友們反而接受唔到，始終仲係停留緊包包小孩子的年紀，其實佢已經係少女，包包有少女心事啦。（有心理準備10年後做埋婆婆未？）乜我要諗呢啲？其實有朋友都同我講過，睇下我有冇呢個福分啦。（有埋個孫咪似三姊妹？）嘩，咁係值得開心喎，咁老公咪做公公？五代同堂，更有福分。」