■Do姐霸氣聲演的爆紅網站BuzzzTube話事人得姐，有型有格。香港文匯報訊 破壞王返嚟啦！新一集《無敵破壞王2：打爆互聯網》將在下月20日走出傳統機舖街機，向刺激好玩的網絡世界出發！由預告片可見，今集其中一個最大驚喜係勁多彩蛋，而本地觀眾更會額外獲贈香港限定獨家彩蛋，就係最有江湖地位、最爆人氣、最龐大的廣東話聲演陣容！由Do姐（鄭裕玲）霸氣領軍，率領全港一眾網絡紅人KOL開聲力撐，包括杜小喬、Hana小花（譚杏藍）、Jason（大J）、屎萊姆、屎嫂程程和Miss Hunny，完全配合今集電影中不停穿梭的一個個人氣網站和網絡紅人，仲有袁澧林幫口，更特別邀請了糖妹和蘇麗珊再度聲演《魔雪奇緣》的安娜和《魔海奇緣》的慕安娜，全力為本地觀眾帶來前所未有的貼地新鮮感，為大家帶來一個笑到有腹肌的開心聖誕！到時全城熱話破壞王，唔睇真係冇話題！
Do姐霸氣聲演的爆紅網站BuzzzTube話事人得姐，有型有格，極具江湖地位，經佢一手提攜的KOL一定爆紅，今次破壞王有佢幫拖，玩轉互聯網完全冇難度！Do姐笑言得姐這個角色與自己十分相似：「大家都係眼光獨到啦！今次佢就睇中破壞王！仲有得姐造型百變，髮型衣着日日新款，同我一樣咁鍾意Shopping！」Do姐更大讚今集破壞王劇情非常豐富，佢都睇得好開心，呼籲大家一定要入戲院捧場！
預告彩蛋 千祈唔好走漏眼
講到電影中的彩蛋，除了預告片已經見到的迪士尼公主大晒冷、鐵甲奇俠、咿唷等之外，Jason 特別推介佢最鍾意的《星球大戰》千歲鷹、R2B2和白兵；譚杏藍就提提大家一定要落足眼力留意巴斯光年、小飛象和Tsum Tsum！最後，如果要用一個網絡用語形容呢部電影，屎嫂程程話：「沒有之一！有咁多迪士尼角色客串，一定係『沒有之一』啦！」；Jason 就話：「LOL！Laugh Out Loud！笑到有腹肌！」
優先場資料
日期：2018年12月9日（星期日）
時間：下午2時50分
地點：嘉禾海運戲院
版本: 2D 廣東話版
印花
The Walt Disney Company (Hong Kong) Limited現送出 《無敵破壞王2:打爆互聯網》優先場戲票40張予香港《文匯報》讀者，有興趣的朋友請剪下香港《文匯報》印花註明「《無敵破壞王2:打爆互聯網》娛樂版」送飛，連同貼上$2郵票的回郵信封，寄往香港仔田灣海旁道7號興偉中心3樓─ 香港《文匯報》， 送完即止。 得獎者於當日電影放映前30分鐘到接待處換取戲票，先到先得。