日前睇睇各馬房養馬數量分布圖，發覺出了一個現象，擁馬數目最多嘅馬房乃葉楚航馬房，現時有七十三駒，根據馬會公布，一個普通嘅馬房，只可養六十二駒，假如有從化訓練營，則可多養十駒，葉楚航從化有訓練倉，可以俾多十駒佢養，總數即可擁七十二駒，但如今多咗一隻出嚟，遲啲可能要掃一隻出馬房。不過，呢個都唔算奇景，最大奇景係丁冠豪宜家收咗七十二駒，大家識計數，正常一個冇從化訓練基地嘅馬房，爆倉數目規定係六十二駒，丁廄足足收多咗十駒，未來日子呢個倉起碼要掃走十駒，否則犯咗養馬規定數目，唔知會罰幾多錢，宜家仍未受馬會關注，可能係第一季開倉，馬會俾一個通融期佢，咁即係話，呢個馬房如要計劃掃馬走，最大機會先清一批五班馬。
現時丁廄五班馬可以話係馬房爭取頭馬最主要兵源，當然呢批兵源盡數胡之後，返上四班會唔會成為馬房嘅爭分武器，呢個就要丁冠豪自己諗，但針冇兩頭利，呢邊收馬收到爆，嗰邊要盡贏五班馬，希望騰出吉位收新血，呢個時候丁廄最佳捧場對象就係五班分子，上周三呢個倉又以一匹五班馬「海之濤」增添頭馬，今次夜賽兩場五班賽均有丁廄馬列陣。五班千二米嗰組有「戥您開心」，陣上依然未近過，相信丁仔只係盡人事，另一匹非常有戰鬥力嘅係「飛壹般」（圖前駒），跑番佢拿手谷草一哩，呢隻李易達寶藏，今季跑兩次谷草一哩，兩次都贏晒，丁仔練得好，亦肯集中火力攻呢個路程，不存二心，呢次吼準作季內第三度進取，一樣向着谷草一哩進發，顯然是擺明車馬向三連霸進軍。此駒九月五日贏季內第一仗，十月三日贏季內第二仗，如今到十一月二十八日才跑第三仗，馬房係想俾足休息時間呢隻馬爭取三連霸，由於部署正面，大家可以放心追捧。