羅富全剛周日贏完「精明才子」後，頭馬數字累積至十一場，倉主即晚在沙田某大酒樓擺五圍慶功宴，因為以現時環境，跑了未足三個月賽事，已有此數目頭馬算唔曳。另一個值得佢慶祝嘅係，今季係佢第二季當練馬師，除成績穩定，羅富全仲有三駒可出席下月初嘅國際賽，分別係「紅衣醒神」、「歡樂之光」及「佳騰駒」，前兩駒經已決定配田泰安跑，「佳騰駒」人選仍在物色當中。剛剛擺過慶功宴嘅羅富全，開心過後又要面對周三嘅夜賽，儘管今次羅富全只得兩駒報名，分別係第三場「大眾精英」及第八場「一舖成名」。後者用黃皓楠披甲，輕磅馬再加一位有三磅減嘅本地薑，唔似搏殺波路，不過另一匹「大眾精英」，季內經已第三次上陣，包括今次所跑嘅谷草千八米，全部由潘頓披甲，最近一次跑第二名，顯狀態漸入佳境。查上季此駒曾喺田草千六米開齋，今季大可依樣劃葫蘆，不過，大家睇睇今周日的沙田日賽，第四班編有千六米賽程，但幕後很有決心安排喺谷草千八米列陣圖收復前失。查「大眾精英」並非首次跑谷戰，上季此駒首戰便是出戰谷草千二米，可惜未有成績。今季所見馬匹成熟進度較理想，轉戰谷草千八米料必合性能進取，再睇埋呢隻馬父線血統，在港同父兄弟馬有「傳奇」、「真跑得」、「瑰麗傳奇」及「琴心星」均是擅於谷戰者，所以有理由相信「大眾精英」是匹谷戰特佳馬，睇練馬師嘅部署，顯然想施殺着。