唔少以「自決」為名掩飾其「港獨」本質嘅反對派中人，喺參選時被DQ，令不少人為咗選舉（特別係豐厚嘅薪酬），唔敢再將「自決」兩個字掛喺口邊，包括平時講就兇狠嘅「眾志」秘書長河童（黃之鋒）。恨選恨到發夢嘅佢近日喺fb帖文中，厚顏地暗示自己屬於「進步民主派」，更同鼓吹「港獨」嘅激進「本土派」劃清界線。有網民就狠批，一個政黨中人連自己嘅理念都可以猛搬龍門，一啲誠信都冇，想呃人投票畀佢都幾難。
改叫「進步民主派」
話說喺立法會九龍西補選中，河童喺為李呃人（李卓人）拉票時發咗一張帖，一開口就寸話「我從來無諗過，自己會幫一個六字頭嘅候選人助選。我更加無諗過，自己會幫一個六字頭嘅候選人告急」。
佢假惺惺咁話，明白點解大家會對「當年反對一員」嘅李卓人有保留，但李呃人一輸，「建制派進一步修改議事規則，首當其衝既（嘅），唔係嗰啲養尊處優、唔開會、唔投票嘅『泛民』，而係少數仲肯身體力行『抗爭』，抗衡梁君彥陳健波『無理』裁決，仲會盡力問到底嘅『進步民主派』。」
河童喺帖文寸「泛民」養尊處優、唔開會、唔投票，即係佢肯定唔會認自己係「泛民」啦。咁佢成日話自己係「自決派」，而議會裡面仲有區諾軒、朱凱廸，但點解冇提話「自決派」，而係用「進步民主派」呢？「神駒」仇思達就喺網台節目上寸佢賣兩面，一面撐傳統「泛民」，一面就想埋「進步民主派」堆。
與「本土派」劃界線
到選舉完咗，河童就再發帖，話佢今次無法動員「本土派」，係因為「眾志」唔係「本土派」，進一步想同搞「港獨」嘅激進「本土派」劃清界線。
益友「Connie Tse」就恥笑道：「黃之鋒一定出黎（嚟）平反自己唔係『本土派』啦，否則一定無得選，以前叫『自決派』，而（𠵱）家連『自決派』都唔敢叫，改做『進步民主派』，你話『本土派』呢個名幾令佢淆底！」
「Spencer Tse」就認為：「我覺得『自決派』的描述都不太準確，『眾志』從來都只係『黎派（壹傳媒集團創辦人黎智英一派）』。」
「神駒」則點破所謂「自決派」「就是『黎主派』的分支品牌，用來對付『本土派』。」「Dyson Li」爆粗批評河童：「對自己嘅理念都可以搬龍門，仲想要邊×個選你吖，你玩×完啦。」■香港文匯報記者 陳川