選舉論壇上各個立法會九龍西補選候選人唇槍舌劍，有時口快講錯嘢都唔出奇。候選人、食衛局前政助陳凱欣日前批評對手工黨李卓人喺房屋政策上冇作為、但又為反而反而反對「明日大嶼」嘅時候，唔小心將李卓人做咗幾十年議員都冇加入發展事務委員會，講咗做房屋事務委員會，李卓人就好似執到寶咁，噚日去廉政公署度投訴陳凱欣「失實同抹黑」𠻹。事實上，陳凱欣前日已經為自己一時講錯而致歉，但李卓人話「唔接受解釋」喎。
有網民就恥笑李卓人，明明論壇當日佢一句都冇反駁過，明顯自己都唔記得有冇參加過個委員會，𠵱家竟然仲好意思投訴人。
「唔接受」凱欣致歉
「哦！你講錯嘢！」咁小學雞嘅指責，原來喺候選人身上都體會得到。話說李卓人執到寶咁話陳凱欣「抹黑」佢，陳凱欣前日已經解釋，自己其實係想講李卓人冇加入過負責土地規劃嘅發展事務委員會，但辯論得激烈時講錯咗做房屋事務委員會，佢亦都因為咁公開向李卓人致歉，但李卓人方面話「唔接受」，噚日仲去咗「舉報」佢𠻹。
唔少網民都恥笑李卓人嘅行為。「Will Chow」話︰「你自己在現場都唔記得有冇入過房屋事務委員會！記得的話，又唔現埸反駁！」
過後才知「執到寶」
「Adam Khoo」就抵死揶揄︰「 一個人有性病而佢唔鹹濕好無辜！人哥有入過房屋事務委員會但自己唔記得仲無辜！」
仲有網民留言寸佢嘅行為同啲學生對住份考卷答唔出，返到屋企揭開本書先話自己識一樣，不過呢個留言就唔見咗囉。
李卓人咁「恍然大悟」原來對手講錯嘢，就連其他候選人都睇唔過眼。喺噚晚另一個論壇上，伍廸希寸佢「無Pad Pad就失魂」，因為佢慣咗帶平板電腦出席論壇，方便團隊通水，但當日論壇主辦方唔畀帶任何通訊器材入場，於是乎佢就唔識即場反駁陳凱欣，「咁荒謬，做咗（房屋事務委員會委員）成10年，佢當時答唔到，夜晚就答到，係咪癡呆呢？」■香港文匯報記者 鄭治祖