■張智霖與家燕姐合唱大展歌喉。香港文匯報訊 張智霖（Chilam）、謝天華日前為12月舉行的《薛家燕愛你無限60年》演唱會進行綵排，張智霖與家燕姐合唱大展歌喉，佢仲話拍劇嗰陣已結緣，所以對方開騷點都力撐，仲練定「十字步」以備不時之需。智霖說：「我已經拉定筋㗎啦，隨時準備好！不過我同家燕姐唱歌就好夾，但跳舞就真係唔多夾，記得上一次同佢拍劇嗰陣，因為跳一小段舞，搞佢整親要入醫院，呢個成為我童年陰影。」
家燕姐聽到合不攏嘴，笑指當年全靠Chilam急才避過急症室排長龍睇醫生：「嗰時跳舞整親要去急症室，點知等好耐都冇醫生睇我，Chilam冇喇喇攞份馬經入嚟問我買邊隻，我心諗𠵱家咪搞我啦！原來佢就係想分散我注意力，靜靜雞急Call跌打師傅嚟，然後佢對護士話跌打師傅係我亞叔，當時我仲一頭霧水唔知邊個亞叔來探病，跌打師傅幾下手勢就搞掂，原來係我軟骨移位，我仲可以急急腳出院。」
演唱會綵排踏入最後階段，家燕姐與樂隊默契十足，不過因疲勞過度出現喉嚨痛，嚇得家燕姐急急搵醫生保護聲帶：「我好乖依時食藥，現在就冇咩事，不過唔可以講太多嘢，要小心食嘢先得。」
而謝天華早前笑家燕姐「有份量」，激發對方減磅，天華呢日亦大讚家燕姐修身有成效：「因為我哋一見面都攬攬，好明顯都瘦咗，為觀眾做到最好狀態係值得的。（你仍然一日只可抱佢一次？）我嘗試緊一日抱佢兩次，因為我自己都做緊健身，加上之後都要綵排，所以希望做到兩次啦！（家燕姐瘦了怕着褲鬆怕走光？）叫造型師幫佢改晒橡筋褲頭啦，一定包冇事！」