■唔知係咪真係驚俾杜汶澤打死，徐少驊上載節目片段「以示清白」。 fb截圖社民連個廢陶（陶君行）早幾日喺網台摸住酒杯底開地圖炮，先用學聯老鬼身份鬧學聯前秘書長周永康同前副秘書長岑敖暉，話佢哋唔應該叫人唔好再鬧老馮（馮檢基）鎅票，之後仲焫着埋親「本土派」藝人杜汶澤，話人哋係「鬼」、收錢做嘢、戲子無情，搞到對方爆晒粗恐嚇要「打×死」佢，仲有同佢一齊做節目嘅「時評人」劉細良同「佔中十死士」之一嘅徐少驊。杜汶澤噚日再寸廢陶，話佢係一個無人識、四五線、一世選唔到議員嘅失敗政客，攞自己個網台嚟搞佢盞貶低自己咁話。徐少驊就上載返節目片段諗住「以示清白」，點知俾人挖返黑歷史，話佢喺「佔中」爆發之前已經轉軚唔撐「佔中」，今次都係明哲保身掟低所謂戰友。
鬧爆陶過氣 走狗寄生蟲
喺杜汶澤爆晒粗喊打喊殺當日，專欄作家畢明已經留言提佢，話徐少驊同劉細良唔似係屈佢，而佢都話會打少兩個人，睇吓會唔會坐少幾碌咁話。佢噚日亦都集中火力片廢陶，話唔會喺自己個網台節目還拖，「放心啦！唔係我唔嬲你，而係幾時輪到你呀？噚日我都俾人問到口啞啞：『屈你收共產黨錢嗰個係咩人嚟？』喂阿哥！無人識你呀！」
杜汶澤又鬧廢陶靠老細施捨，係政治圈嘅寄生蟲，係一個四五線政客、一世選唔到議員嘅失敗者，仲有就係「泛民」嘅豬隊友，「所以你嘅mindset（思維），永遠諗人哋係走狗。因為你自己係，喺極度害怕孤獨嘅情況下，希望全世界同你一樣，都係鬼。」
徐少驊快閃 被回帶「佔」前逃亡
唔知係咪真係驚俾杜汶澤「打×死」，徐少驊前晚上載咗節目片段，話佢哋三條友講嘢重點各有不同，希望網民睇吓再行判斷喎。無錯，徐少驊真係幫過杜汶澤講過兩句好說話，話直覺上覺得對方係「真心本土」，之後廢陶就插嘴嘞：「但係佢戲子嚟㗎喎徐伯，戲子無情喎。」
不過，「Wen Li Yang」就寸佢：「講到明哲保身呢家嘢，徐少驊你果然係閃電第一人！」「Calvin Tong Wen Li Yang」亦都話：「佢係『佔中十死士』中嘅『快閃黨』。」回吓帶先，徐少驊喺2013年5月成為「佔中十死士」之一，不過喺2014年9月初、「佔中」都未爆發嗰陣，就轉軚話自己6月已經退出咗，仲反對用違法手段去爭取民主??。
「Jaycee Luk」亦都質疑佢無即場剎停廢陶：「係啦係啦，你呢啲人同見到人做衰野（嘢）唔即刻出聲，之後就係（喺）網上post（上載）片話『嗱係佢衰咋，你睇吓』一×樣。」
亦都有一啲疑似視障嘅「黃絲」力撐佢哋三條友。「Jacob Yip」一口咬定：「本土×故意斷章取義。」「Real Soso」亦都話：「其實佢哋（『本土派』）有心插你哋，捉住你一兩個字去捉字蝨，??家焦土專門技術，??家互聯網cap（節錄）你兩句說話，然後就大做文章， 放大1,000倍 ，最大目標就係長毛同『泛民』， 你見佢最後嗰段說話就一清二楚 ，成個都係局。」
Cedi Chan就唔妥杜汶澤喊打喊殺：「杜生×人老母臭化×，咁陶伯劉伯咪又要碎佢屍萬段？陶伯都係質疑咋，咁大反應？真係on××（戇××），拍緊黑社會（片）咩？」
■香港文匯報記者 陳庭佳