江嘉敏加入TVB不足兩年已成為「新一代宅男女神」，更由首部參演的TVB劇《親親我好媽》演學生妹到最近的《兄弟》首次擔正演女一。她從小已立志入娛樂圈，不惜為追夢而和媽媽鬧翻，到現在終於獲得媽媽支持。最近，江嘉敏被指與30歲的電競公司高層蜜運中，她亦大方承認，更大讚對方好細心又老實。
身高5呎5的江嘉敏（Kaman）名校出身，中學時已參加不少演出。16歲任平面廣告模特兒，其後拍過短片《野犬與貓咪》及電影《此情此刻》，有一定的演出經驗，後簽約為TVB藝人，成為力捧一代。本打算一畢業就報考演藝學院，媽媽對她的選擇並不支持，但Kaman覺得機會難得，不惜同媽媽鬧翻也堅持入行，最後媽媽半推半就成全她的願望。
「媽媽起初不支持我入行，覺得做醫生律師才是正途，也因擔心我夜歸、會學壞。後來入咗行，媽媽看到我陸續有工作，就比較放心，雖然口裡從沒讚過，但我知道媽媽常用手機拍電視上的我，然後放上facebook，雖然表面沒說出來，心裡應該是開心的。但她都擔心我紅不起來、演技不好。所以她想我去進修鋼琴，萬一不當演員可以回去教琴。」
一度因緋聞躲起來反思
人紅自然多是非，於英國拍《兄弟》時，Kaman與視帝人夫王浩信傳出緋聞，引來大批負評。要一個剛滿24歲的小女孩去面對這些負面報道，Kaman直言有點徬徨。
「我是一個好『麻甩』的女生，同人打招呼會好粗魯百厭，好『男仔頭』。發生浩信件事後，我唔開心，唔明白點解要咁寫我，甚至躲起來一星期反思，是否待人處事做得不好。幸好當時出埠同房的劉穎鏇跟監製林志華來開解我，帶我出來面對大家。係劉穎鏇拖住我過去同浩信打招呼打破隔閡，我覺得大家講得好啱，如果因為咁小事而影響自己表現同團隊，對大家好唔公平。」
《兄弟》中，不少演員身懷絕技打到飛起，身為女保鏢的Kaman於劇中卻只負責行行企企，沒有任何打戲及開槍鏡頭。
「傾角色時，我見自己是女保鏢，以為自己要打啦，點知唔需要。本身Lam（監製林志華）話我唔使打，但應該要揸槍，仲話會寫多啲揸槍場面畀我，搞到我好興奮，仲喺屋企苦練揸槍姿勢，但最後係一場揸槍戲都冇。後來我同監製講你呃我，佢話開續集時，再後補返畀我喎。與浩信在劇中飾演情侶，兩人是歡喜冤家，但親密戲欠奉，反而最難忘是劇中要摑浩信30、40巴，務求摑醒對方。那幕拍了3 take，加起來摑了差不多過百巴，全部都是真打，開頭我都有就住，但浩信話要用點力水才夠狠，他還自摑示範一次給我看。不只他的臉被摑紅，我的手都打到紅。」
愛情種子從打麻將萌芽
近日被爆同30歲的電競公司高層Anthony十指緊扣，甜蜜拍拖。上月生日，男友專程飛去台灣，親手做了她最愛的焦糖朱古力生日蛋糕與她慶祝。甜蜜程度，單看Kaman臉上的甜笑，已經sweet到暈。
「其實拍了好短的一段時間，沒想過咁快被人影到，不過唔緊要，也是開心事。我們是農曆新年初，一班朋友一齊拜年食飯，大家喺度打麻將，我唔識就坐埋一邊，之後他就叫我坐喺他隔籬學吓。他好有耐性解釋畀我聽，我係咁問，後來約出來吃飯。他初時唔知我是藝人，後來仲問我第一次見面做咩唔化妝，我答佢『大佬，玩咗成日，你見我時個妝都溶咗一半了。』」
Kaman大讚對方好細心兼老實，「平時拍劇捱夜，會買湯包給我，生暗瘡又會買藥膏給我。我份人好急，他就有耐性，他每次看見我發忟憎，就會跟我說『你先不要忟憎，好好冷靜一下，你這樣心急就會做漏或做錯事情』。他為人又老實，不太懂花言巧語，而且很喜歡幫助朋友。」
採：植毅儀／攝：曾慶威
Makeup：Namnam Lam ／Hair：Haffman Cheng ／Wardrobe：Wardrobista／場地：1963木十豆寸