上個禮拜王晶贏咗隻「與龍共舞」，賽後與阿叻同阿倫齊齊接受訪問，佢哋仲話中埋三T，但中唔足，講真呢條三T，最難搞都係尾關，頭兩關正路馬好多都入晒圍，尾場爆出「幸運神駒」、「好腳頭」及「安賦」，最冷係三十一倍「安賦」，其餘「幸運神駒」九倍及「好腳頭」十三倍，都係有分頭馬，但呢兩隻馬分別來自丁冠豪及羅富全嗰倉，照計點都會有人打佢哋主意，但睇條三T派五百三十幾萬，馬會公布只有四元中，咁即係講，假如佢哋中晒四蚊都係得二百萬，咁真係唔多抵。雖然三T中唔晒，但嗰隻再捷嘅「與龍共舞」，一定中得應棍過上次夜賽谷草一哩，點解咁講？大家有冇發覺阿叻、阿倫同王晶拉頭馬嘅時候，只係得副練梁明偉在旁，原來何良仲喺澳洲買緊馬，當日倉主唔喺香港督戰，呢三位仁兄卻出現馬場為愛駒打氣，咁講一定屬於大豐收嗰隻。剛周日阿叻出現馬房探班，顯然係代表晶哥醒班馬房工作人員，期間又講番中三T呢一單嘢，話自己幾咁唔抵，馬房手足一路招呼佢，而副練就按阿頭指示辦事，分別安排咗「放眼量」（圖4號）同「幻影飛鷹」行街，賽前保持一些輕鬆嘅運動量，並用手機將過程拍下，未知是否稍後將片段送俾身處澳洲嘅何良。據悉何良明晚可以入場督師，呢一對特別吩咐副練行街嘅馬匹，其中最令人注目仲係隻「放眼量」，近三場都係跑谷草一哩，取得一冠一亞一負成績，落敗一戰就係近期所跑，當時排十一檔，排檔差不特止，更甚係當晚天氣唔穩定，所跑嘅係黏地，突然間「放眼量」喺唔理想嘅場地同檔位出戰，未有成績交出係可以理解，馬房手足透露，呢一隻馬埋門狀態同贏馬時係一樣，按理今次跑番正常場地，排番個有利五檔，加上用番贏馬功臣李寶利，應該可以還我本來。