丁冠豪上周又以「幸運神駒」添勝仗，隻馬季內跑五場得四冠一季，其中三場頭馬係由蔡明紹策騎，另一場就由巫顯東跑，馬主當然喜上眉梢，仲派紅錢俾蔡明紹，所以今次夜賽丁廄雖然冇馬關照蔡明紹，但佢一樣入丁廄睇馬，順便攞埋馬主嘅一點心意。而丁冠豪亦相當識做，午飯期間訂咗Pizza和大量生果俾員工享用，佢本人亦冇諗過，唔使半季經已打好基礎，現時養馬數目爆上爆，下一季經已申請上從化開設訓練基地。今次夜賽第二場由第五班馬跑一千米，丁冠豪馬房又有隻「創意寶」列陣，安排由梁家俊披甲，馬房除咗呢匹五班馬用上梁家俊外，出戰第六場第三班千二米嘅「愛馬劍」，一樣用梁家俊披甲，而馬房方面絕對睇好呢匹第五班馬「創意寶」。「創意寶」今季係由田泰安以一放到底姿態贏谷草千二米，再出跑咗兩場都無影，其實，在「創意寶」贏谷草千二米前，隻馬經已交由梁家俊搏過場谷草一千米，僅得第三名，呢仗狀態只屬初起，再出由於梁家俊停賽關係，惟有轉由田泰安披甲，結果嗰次真嘅能一放到底獲勝，八歲老黃忠打了呢兩場硬仗後，近兩仗陣上表現走樣，低班馬可以話見慣不怪，今次馬房安排牠出戰第二場五班一千米，呢場係水兵鬥海軍場合，睇今次賽前小丁嘅備戰手法，下午經常只安排「創意寶」行機操練，決心讓呢匹老黃忠儲夠火力至跑今場，屆時用梁家俊騎，可望交出早前田泰安贏馬一役嘅水準。