今季方嘉柏馬房都接收唔少轉倉馬，好似近幾次賽事咁，主要受人追捧嘅馬，都係圍繞住一批轉入方廄冇幾耐馬匹，馬迷亦相當醒目，睇實呢批馬嘅動靜，好似上次日賽嘅「狀元才」，谷草千二米由巴度拚失，立刻轉手由潘頓轉戰泥地千二米希望補中，卻未能成功，不過同系嘅「運才」，未幾就喺夜賽補中。當晚除「運才」轉入方嘉柏馬房好快便有頭馬交代外，跑到尾場仲有一隻「赤兔寶駒」從後備補上跑谷草千二米，倉主賽前一日得悉補出嘅消息，立刻搵番贏過呢隻馬嘅蘇兆輝上陣，臨場本是二十多倍冷門，但入閘後跌到十四倍開跑，雖然無功，但證明呢隻上季轉入方廄嘅馬，現階段又有再勝條件，呢鋪路短都想搏命，下次跑一哩路程，應該更合適。
講轉倉馬，今次周末賽事，方嘉柏亦有唔少加盟佢旗下後，尚未交代嘅馬匹列陣，其中兩駒就係「瑩之光」及「喜勝駒」（圖黃色綵衣），前者新加盟，仲有時間走盞，但「喜勝駒」今季經已跑過幾場熱身，點都要有啲交代。而「喜勝駒」馬主嘅父親，由咖喱方時代經已有馬匹支持，咖喱方父子跟呢位馬主羅先生交情相當好，而佢女兒嘅「喜勝駒」，自今季由大摩馬房加盟方廄後，一直都係搵緊出路，季內四戰走得最近路程就係泥地一哩得第四名，今次返回呢個路程列陣，交番俾潘頓騎，一定有多少信心。「喜勝駒」今季由大摩投入方嘉柏後，首兩戰列陣都係由潘頓操刀，最初係跑田草千四米，也係大摩豢養時候唯一入位嘅路程，潘頓認真發揮，走勢不外如事，翌仗轉跑泥地一哩，今次潘頓騎隻馬跑入一席殿軍，到最近兩仗交何澤堯手上跑田草千二及千四米，均非目標所在，熱足身今次用回潘頓跑泥地一哩，相信應係「喜勝駒」交代嘅時候。