現階段一批四歲馬正努力爭分跑打吡，今次夜賽，又有一匹報咗名跑打吡嘅馬，就係列陣第七場三班千八米嘅「平海飛星」，呢隻馬出自蔡廄，上屆打吡冠軍就係由呢系人馬取得，憑「平海福星」奪冠，「平海飛星」今季若能跑到打吡而贏埋嘅話，肯定屬一時佳話。不過，從隻馬季內兩戰嘅表現，似乎狀態及適應能力來得較慢，希望今戰有進步嘅走勢，下一場就有機會跑打吡前哨戰，爭分取得入圍資格。本來呢場賽事中亦有一匹要增分跑打吡嘅馬，此乃高廄嘅「協勝神駒」，最終因進度較慢嘅關係，喺排位時退出，由後備馬「金龍神駒」補上，意思即係話俾大家知，高伯新唔會放過任何一個替旗下馬匹贏馬嘅機會。大家睇一睇大馬主余潤興今場有高廄嘅「協勝神駒」及「金龍神駒」一對馬報名，另苗禮德馬房嘅「英明神駒」亦出戰，普通一場三班賽事，馬主出動三駒報名，必然已鎖定目標。如果論狀態及近績，「金龍神駒」係勝一籌，儘管跑谷草千八米苗禮德嘅「英明神駒」係最拿手，過往曾經兩捷，但看今季呢隻馬跑過三仗狀態普通，所以幕後出擊主力應該唔係放其身上，反而「金龍神駒」季內四戰，經過兩場熱身賽後，近兩仗分別喺田泥千八米及谷草二千二百米上名，狀態漸入佳境，即使谷草千八米未有上名成績，但過往僅跑過一仗，亦係隻馬喺港首戰嘅成績，故敗不能作準，呢仗「金龍神駒」獲廄侶刻意讓路，顯然係有部署嘅一戰。