今次夜賽編有兩場五班賽，一場係跑一哩，另一場係跑二千二百米大長途，喺一哩嘅一場。蘇偉賢馬房嘅「堅離地」今季初次用上莫雷拉披甲，其實蘇偉賢夾莫雷拉並非新鮮事，但自從莫雷拉轉任蔡約翰馬房主帥後，兩人今季嘅合作機會不及以往頻密，畢竟莫雷拉要先騎蔡約翰嘅馬，想借用佢一定要喺時間配合得妥當先至有機會。上季莫雷拉依然係公司騎師嘅時候，佢同蘇偉賢馬房曾經合作過五十七次，錄得十二冠十三亞五季成績，大家加一加三甲上名場數，總共係三十場，落第嘅只有二十七場，即係講莫雷拉夾蘇偉賢嘅坐騎，有超過一半上名率，騎練合作有晒默契。
今次「堅離地」用到莫雷拉出馬，顯然係馬房最後嘅一招，因為季內呢隻馬經已跑咗六場，場場用大師傅搏殺不特止，當中有三場係用上潘頓執韁，結果兩場獲亞軍成績都係喺谷草一哩，一場係敗喺「荷蘭風車」蹄下、另一場則輸俾「怡德」，最近一場跑田草千二米先至三甲不入，基本上潘頓跑呢隻馬經已用盡心機，奈何總與冠軍擦肩而過。其實，大家只要睇睇「堅離地」季內兩場得亞軍嘅一哩賽事水準，就知係非常高嘅賽事，其中一場贏牠嘅「怡德」，其後升番四班跑，依然可以喺同一個路程上名。至於「荷蘭風車」，連同呢場贏「堅離地」嘅谷草一哩賽，牠經已喺此程贏過四場，係匹低班谷草一哩好手，因此，只要「堅離地」繼續保持水準，相信好快就能喺呢個路程打開勝門。
原本呢隻馬上周二經已由史卓豐過檔彈泥地千二米大閘，後來幕後經過商量先至決定用雷神上陣，由此可見佢哋對「堅離地」嘅重視，今季潘頓剃雷神嘅眼眉唔少，今次有機會俾雷神還以顏色，料呢匹馬屆時必定跑出最佳水準爭勝。