馬會替十三少韋達搞咗個跑馬地告別儀式，但仲有個較大型告別會喺韋達年初六真正掛靴時搞，有韋達粉絲經已講，當馬會宣布發牌俾韋達開倉嗰日開始，經已日日追住韋達坐騎捧場，希望搵番隻收山馬咁話，大家應該記得有次日賽尾場，韋達騎隻「翠湖飛鷹」，臨場狂落飛，一度追住隻大熱門馬「最合拍」，嗰場「最合拍」跑得亞軍，但「翠湖飛鷹」就影都冇，事後睇番都係怪韋達啲粉絲太過熱情。嗰日「翠湖飛鷹」升上三班跑千四米，所負磅位係一一四磅，韋達要超兩磅騎，其實，韋達只可騎一一六磅馬，呢日仲要多減兩磅，咁都唔緊要，最慘仲係跑尾場，即係講成日唔食得嘢，假如前面九場唔使騎馬仲可以頂得住，不過，韋達之前幾場用咗唔少氣力，跑到尾場你哋話佢可以發揮到「翠湖飛鷹」幾多成威力。又好似剛跑完嘅夜賽，韋達亦要超兩磅騎「軍民歡」，由於屬高班賽，必定係較後場次，韋達又要節食到第六場，冇表現可以話係預咗。所以要搵韋達收山馬，最緊要睇佢嗰日需唔需要節食跑超磅馬，即使有超磅坐騎，但只要編喺頭一、兩場都唔緊要，可以拿拿臨跑完返更衣室食嘢補充吓體力。好似今次送歲賽，韋達要超兩磅跑第五班隻「心思熟慮」，好彩低班馬編喺第一場跑，影響唔到隨後坐騎要用力氣發揮。睇番告東尼馬房嘅「悅裕」，編喺第九場跑三班千八米草地賽，上仗馬房經已同隻馬報戰呢個路程，由沈拿跑入一席第二名，睇鞍上人爆呢隻馬拉士嗰段，足可媲美田泰安季內贏千四米嗰場，今次告東尼唔用沈拿，又唔用田泰安跑呢隻馬，偏偏要用韋達，大概告東尼都知道，要一位冠軍騎師好似佢當年咁有隻「風雲群英」收山，練馬師唔幫吓手，又點會有啲感人場面出現，「悅裕」九成九係韋達收山馬。