在從化有訓練基地嘅九個倉，有多十匹養馬額，所以馬會將佢哋頭馬合格門檻略作調升，正常倉贏十六場就合格，但有從化倉嘅馬房就要十八場頭馬至合格。睇睇今季榜尾練馬師中，有兩位正係有從化倉，一個蘇偉賢，另一個係蘇保羅，兩人成績仲衰過一啲正常養馬量嘅倉口。蘇偉賢現時有十二頭馬，距十八場之數唔係太遠，但蘇保羅現時頭馬只得七場，大家計吓數，馬季共跑八十八次，今次係第四十三期賽馬，幾乎跑咗一半咁滯，蘇保羅只係贏得七場頭馬，下半季仲要跑十一場數，唔努力嘅話，今季真係因加得減，養馬量增加，但贏馬數字卻減少，成績確實強差人意，好彩近期馬房手風開始轉順，明日十場混合賽，只要實力馬交出正常水準，相信又有機會增添頭馬進帳。當中喺第二場五班泥地千八米列陣嘅「萬霸駒」，由於所角逐泥地途程非常合腳法，加上今次所面對敵手，能勝任泥地千八米除八歲老黃忠「糖黐豆」外，同場無一匹係有言勝嘅把握，即使「萬霸駒」泥地性能超卓，但跑呢個路程四戰只得一亞，呢席亞軍係近期開始成熟後至取得。今季「萬霸駒」就係喺泥地千八米跟「幸運神駒」串Q，前者雖然贏牠兩個餘身位，但翌仗「萬霸駒」跑泥地一哩即可順利補中，由此可見丁冠豪嘅「幸運神駒」泥地實力係幾咁犀利。今次「萬霸駒」用李寶利呢位冷殺手披甲，有機會再替蘇保羅馬房增添頭馬數字，逐漸擺脫榜尾嘅名次。