■財爺太太許步明身穿湖水綠連身裙老公打氣。財政司司長陳茂波噚日到立法會宣讀新年度財政預算案。為咗配合今年財政預算案嘅封面顏色，財爺亦特登戴返條靛綠色嘅呔，其太太許步明就身穿湖水綠連身裙，坐喺立法會公眾席為老公打氣。綠色帶有一元復始，萬象更新嘅意味，睇得出兩人似乎都想透過衣着呼應返新一份嘅預算案，期望預算案可以令香港繼續欣欣向榮。
預算案演辭封面顏色為粉綠色。陳茂波日前喺網誌話，媒體通常會對封面品評一番，所以喺選定封面顏色時，除咗個人偏好，某程度亦反映佢喺面對刻下經濟環境與挑戰時嘅感受。上一份財政預算案嘅封面顏色為橙紅色，係因為去年初環球經濟一片向好，所以預算案嘅封面顏色偏向較有動感活力。
陳茂波解釋，新年度預算案演辭封面選擇粉綠色，係因今年前景頗為不明朗，係有危有機的關鍵階段，又話香港係充滿生機嘅土壤，但仍要播種、灌溉、努力耕耘，先能夠有所收成，所以今年先會揀綠色喎。■香港文匯報記者 何西