向來被視為傳統「飯民」嘅鴿黨（民主黨）近排越走越激，企圖爭取「自決派」以至「獨派」嘅支持，日前失驚無神話要特首林鄭月娥落台，仲扭計話諗住唔去立法會個長三角考察團𠻹。嘩，唔去考察咁大動作，真係嚇到唔少網民笑出嚟，有人就留言話「關人鬼事」，亦有人揶揄佢哋少咗一次免費旅行𠻹。
網民一眼睇穿門面功夫
立法會今個月21日到24日會去長三角做職務訪問，了解當地發展，而鴿黨嘅尹兆堅、林卓廷同黃碧雲都已經報咗名。不過，舊年去完大灣區考察團之後，鴿黨主席胡志偉受訪時都幾認同大灣區發展，結果喺網上面又俾班激進派以至「獨派」聲討咗一輪，唔知係咪諗起呢個「慘痛經歷」，再加上𠵱家扮緊激進，於是佢哋𠵱家就重新考慮緊係咪要去嘞。該黨立法會議員涂謹申仲開到聲話𠵱家唔係適當時機去考察喎。
唔少網民都一眼睇穿呢啲門面奶牷C「Calvin Choi」直斥︰「有×用咩，唔好做啲無意義嘅事當係抗爭左（咗）啦。」「Wong Chi Fai」揶揄︰「民主黨聲言退出『立法會長三角考察團』，好厲害，足以令特首下台。」
唔敢面對繁榮強大國家
有啲網民就話從來都唔旨意佢哋有貢獻。「kenny」話︰「經濟民生事，從來不旨（指）望『犯民』，只懂搞政治的政黨、政棍，終有一日會被清醒的選民捨棄。」「lewisf」亦話︰「呢班垃圾祇（只）會唱衰中國，佢地（哋）唔想見到繁榮強大的中國......佢地（哋）唔敢面對現實。」
有網民則膠都費事派畀佢哋。「?焱龘」話︰「唔想去咪唔好去囉，關人鬼事。」「退休獵人」仲寸︰「涂生，你有咩料識去考察？對你嚟講只係一個免費旅行。」
■香港文匯報記者 甘瑜