近期兩位公司騎師貝力斯同夏禮賢，似乎唔多適應香港跑馬嘅節奏，唔少實力馬都跑得麻麻哋，喺競爭咁激烈嘅環境，唔改善嘅話，真係好難搵食。有時馬房冇雷神同潘頓兩位大師傅可用嘅時候，就會搵一啲稍為可靠嘅騎師，今次日賽利敬國復出，坐騎都唔少，而有啲坐騎似乎係有心等佢復出至報名上陣，當中大家就注意嘅係羅廄「日日精彩」，呢隻馬首戰唔係俾利敬國跑，而係郭能，兩倍馬跑到影都冇，最後仲要被問話，之後就換利敬國跑泥地千二米，結果輕輕鬆鬆贏第二名馬「有利高」一個馬位開齋，馬房睇得呢隻馬好高，再出人馬轉戰田草千二米，賠率依然硬淨，由開齋三倍變成兩倍開跑，結果一樣輕易取勝，贏第二名馬「智愛」個半馬位，正當馬房安排呢隻馬喺二月七日衝三連勝嘅時候，賽前一日發覺左前腿不良於行被迫退出，受傷後至今再冇出賽。其實不良於行，亦分好多級及程度，「日日精彩」小休咗三、五日即回復內圈踱步，備戰工夫從頭做起，足足用咗個半月嘅時間重新準備，所以論作戰狀態，確實係一絲不苟。馬房自從將呢隻馬出擊目標定喺今次日賽後，埋門一連串嘅準備過程亦刻意加辣，上周二由利敬國試一課泥地大閘，走位4 4 3，全程鞍上人按到實一實，雖然只係第三名過終點，但輸俾跑第一名嘅「精算風暴」唔夠一個馬位，呢匹短途明星馬，今次操好而來，配合利敬國復出，羅富全都算係位有情有義嘅練馬師。