每季成績都唔錯嘅沈集成馬房，近呢大半個月好似食滯咗咁，數對上一次贏馬已係三月二十三日從化贏「力奇先鋒」，不過睇睇呢個馬房今次報名馬，實力都唔算強，牌面最惡都係上次從化取得頭馬嘅「力奇先鋒」，仍然由原庄配搭何澤堯騎番，但因為同場都有唔少惡馬，例如新勝嘅「團結精神」，仲有季內經已喺田草千二米交出兩W嘅「英之友」，「力奇先鋒」要過呢兩關都唔容易，不過，信任馬房及何澤堯鬥志，呢場「力奇先鋒」都會搏老命，希望贏個孖寶。大家有冇留意，近期沈集成開始俾多咗實力馬何澤堯上陣，上周日尾場隻「紀利雄星」，亦都係交俾何澤堯出擊，可惜遇大熱門實力馬「威進駒」潘頓神級發揮，慳盡位楔內欄衝嘅「紀利雄星」，最終只得第二名，但呢席第二名，幕後經已收貨，事實真係唔夠人鍊。呢次日賽沈集成除交隻「力奇先鋒」俾何澤堯再騎之外，馬房隻第五班馬「好運齊來」（圖紅帽）再次交俾何澤堯操刀，希望能幫隻馬打破悶局。
呢隻「好運齊來」，其實今次屬季內第二次交俾何澤堯發揮，早喺季初嘅時候，曾經有場谷草一哩交過俾何澤堯跑，用均速領放戰術，取得一席第六名，咪以為名次好後，其實所輸俾頭馬「荷蘭風車」只係一位一。不過，何澤堯跑完呢場後，再冇機會騎番呢隻馬，因為法國好手巴度殺到，沈集成上季與巴度合作得唔錯，因此將旗下戰馬盡量支持巴度，結果巴度接手呢隻馬，但跑過一場經已唔騎，至於「好運齊來」係咪咁水，查季內曾兩次入位置，包括最近一仗田草千六米，鞍上見習生用且戰且走戰術，而呢種跑法，亦算係何澤堯強項，所以今次「好運齊來」配何澤堯，有權發揮出呢隻馬最佳水準，贏回一場向幕後交代，亦希望馬房由呢隻馬開始重拾旺氣。