四月份大家嘅注意力都會集中喺月尾三場一級賽，香港馬王「美麗傳承」將會出戰冠軍一哩賽，只要順利贏埋今仗，即可創下一季八連勝紀錄，下個目標就係六月份嘅日本安田紀念賽。大摩雖然係盃王，但遠征嘅成績就麻麻，希望能憑「美麗傳承」留下美好嘅戰績。今次「美麗傳承」若跑安田紀念賽，日本馬后「杏目」就有機會跟香港馬王拗手瓜，本來「杏目」今年贏完杜拜草地大賽後，下個目標係跑法國凱旋門大賽，但幕後驚遠征次數太密，寧留喺日本跑其他大賽，安田係「杏目」最大目標之一，假如真嘅成事，今屆嘅安田紀念賽又會矚目整個世界馬壇。大摩對「美麗傳承」嘅部署一早已公開，至於今周三嘅部署，馬房出擊箭頭只放喺一駒身上，就係角逐第三班千八米嘅「合拍威龍」。今季「合拍威龍」經已交出兩冠一亞一季成績，先喺谷草一哩由蘇兆輝打開勝門，後再部署喺谷草千八米由潘頓取得季內第二捷，最近一仗跑谷草二千二百米，由於嗰場大摩出三隻馬，潘頓揀咗「喜蓮彩星」上陣，「合拍威龍」唯有配上貝力斯，而負一三二磅嘅「合拍威龍」呢仗只得第三名，不敵廄侶「喜蓮彩星」及丁冠豪馬房嘅「扎西德勒」，但能交番一席第三名已係相當難得，今次馬房安排隻馬跑番較合腳法嘅谷草千八米，鞍上人又一早搵番贏過呢隻馬嘅潘頓，人馬合拍之餘，馬匹今次所跑嘅亦係季內贏馬路程，相信以現時水準，要贏今季第三W唔難。