姚本輝係早前公布四位獲從化設訓練倉嘅練馬師之一，其餘三位獲得喺從化開倉嘅練馬師，丁冠豪率先喺月底運馬上從化，接住五月份輸到羅富全，容天鵬及姚本輝要到七月馬季差唔多完結至安排馬匹到從化，目前姚本輝只集中練好參戰馬匹，有成績後先至有機會向幕後游說入一啲好馬，因現時獲得設從化訓練倉後，養馬數量可以由六十匹增至七十匹，兵源要大力擴展，一班支持開姚本輝嘅馬主，定會全力支持，而一直支持開姚本輝馬房嘅「開心有你」（圖5號）團體，現時仲有一匹未出過賽嘅新馬「精彩有你」，呢個團體由「全因有你」開始就一直支持姚本輝，但首匹支持姚廄嘅「全因有你」，未贏過就因健康問題退役，期間「全因有你」跑四仗有三場位置，唔算太差。
至於代替「全因有你」嘅「開心有你」，到目前為止，喺姚普]過三季，首季就贏咗三W，但近兩季卻無頭馬交出。今次馬匹終於喺評分方面獲得大利，由最高時嘅二班評分，一直減到現今能上陣嘅四班，當然要馬房及幕後夠耐性。今次馬房安排隻馬跑番最拿手嘅谷草千二米，呢個路程就係隻馬首季喺港上陣取得三W嘅路程，儘管前仗喺四班由李寶利披甲跑呢個谷草千二米而三甲不入，但今次換上黃俊就有唔同睇法。前仗「開心有你」喺李寶利胯下以一三三磅跑谷草千二米，落敗唔出奇，因為呢隻馬負超過一三○磅或以上嘅磅位，通常係難發揮出水準，今次用黃俊，減輕五磅負擔，就有利隻馬喺四班爭勝。翻查過往呢隻馬跑四班嘅成績，尤其係谷草千二米，只係跑過三次，頭兩次都係由羅理雅策騎，負一二六磅得第三名，上名後加至一二九磅，卻順利取勝，今次用黃俊騎，只以一二七磅列陣，正係符合隻馬喺四班跑谷草千二米嘅爭勝條件，屆時大家不妨捧吓場。