大摩上次日馬憑「信心保證」捧走港澳盃，對上四屆已三奪錦標，與羅富全緊隨住領先嘅蔡約翰，今季冠軍練馬師之爭呈現三強鼎立局面，今季仲有十幾個賽日真係有排鬥，季尾嘅焦點同話題一定離唔開呢三個練馬師邊個封王。阿蔡今季季中發力，本來頭馬已經大幅帶離其他對手，但係最近兩個月好似食滯咗，冇哂之前狂風掃落葉、一日贏幾場嘅強勢。事實近期阿蔡出賽馬唔多，跑嚟跑去都係嗰手評分已經飽和嘅舊馬，搏落往往近而難贏，令到佢領先優勢大幅收窄，隨時有埋唔到尾嘅風險。不過，阿蔡向來不乏優質新馬，呢啲潛質未露嘅新馬係咪趕得切喺季尾階段操起候命，直接影響佢爭冠軍嘅形勢。阿蔡早前同莫雷拉延長主帥合約至煞科日，可能係佢爭冠軍嘅後着，始終有個靠得住嘅主帥，同對手馬匹實力差唔多，短兵相接時往往就係騎師騎功走位定勝負。大摩玩埋下季就正式榮休，唔使問都知佢想重溫冠軍滋味，爭冠嘅決心完全唔使懷疑，事實佢牌面亦一啲都唔輸蝕。佢訓練嘅「美麗傳承」今季蟬聯馬王寶座十拿九穩，如果贏埋冠軍練馬師，就真係非常完美。佢最近安排出擊嘅馬都用好手兼不計賠率，熱唔緊要，最緊要贏。兩個約翰各有優勢，但千祈咪睇小曾經做過佢哋副練嘅羅富全。羅富全上季開倉至今成績有幾勁，都唔需要多講，其實佢現時嘅兵力，唔會差得過兩個前波士，手上有一批質態兼備嘅馬幫妢m分。羅富全有樣嘢肯定勝過兩個前波士，就係普羅馬迷嘅支持，馬迷都想全哥繼葉楚航後，成為另一個華人冠軍練馬師，為本地薑爭光。近年每逢爭冠軍鬥到季尾，不論騎師或練馬師，不時都有啲意想不到嘅賽果，好似有劇本咁戲劇化。家陣三個練馬師距離咁近，每次賽事後爭冠形勢隨時有好大變化，即管睇吓劇情又點樣發展。
自從化訓練中心喺季前啟用後，今季賽事要兼顧多咗馬匹喺當地訓練呢個因素，所謂嘅從化兵有唔少都交出表現，似乎早前馬匹中港兩邊走嘅顧慮慢慢消除。馬會今年三月已經喺從化馬場攪咗首個速度示範賽，透過幾場真跑嘅模擬賽事，等外界知多啲從化馬場嘅設施同環境，據知馬會已籌備緊第二次示範賽，初步敲定喺下季季初時段舉行。據了解，馬會已經準備喺下季初，大約十月底或十一月初嘅其中一個禮拜六，喺從化馬場舉行第二次速度示範賽，形式同之前首次示範賽相若，不過安排就冇咁大陣仗。馬會喺首次示範賽攪得高調認真，始終係第一次喺內地展示港式跑馬，而且投資咁多大興土木，自然邀請咗好多中港政界嘉賓見證歷史時刻，唔計啲門面嘢，整體嚟講首次示範賽亦算非常成功。有過經驗之後，可以預期下季初嘅第二次示範賽會攪得更好。