呢頭俾大摩同羅富全追近咗嘅蔡約翰，夜賽即發動新一輪攻勢，憑一批質新馬爭取成績，雖然「跳出世界」未能跳進凱旋門，但另一匹「好利運來」卻可以成功連捷，進一步拋離大摩及羅富全。大家不妨睇一睇，呢次日賽，蔡約翰又有唔少名氣馬列陣，好似跑千四米特別準繩嘅「請跟我來」及暫時五戰五捷未輸過嘅「勝得精彩」（圖4號），呢兩隻準得交關嘅馬，應可替馬房再增添頭馬進帳，尤其係嗰隻「勝得精彩」，幕後好重視呢隻馬嘅前景，有冇機會成為大賽棋子，就係睇呢次千六米跑成點樣，呢隻馬頭四仗贏千二米，過程係不費吹灰之力，到咗第五仗出戰，馬兒由第三班升上二班，面對更強對手，正路部署馬房應該揀番呢隻馬贏開嘅千二米路程，希望跑番一個有把握嘅路程制敵，但馬房睇得呢隻馬好高，剛上二班竟夠膽向千四米進軍，升班加程，係個雙難度挑戰，仲有一個難度，就係抽埋一個十四檔，大家試諗諗，即使一隻四戰四捷馬依然有分揸喺手，卻要跑一場挑戰三個難度嘅賽事，除非仲有大量評分揸手，否實定會被幕後睇淡。但呢三個不利因素，絕對動搖唔到幕後捧呢隻馬嘅信心，結果臨場依然被捧成一點八倍大熱門，最終「勝得精彩」無令人失望，排十四檔一樣贏第二名馬「信心保證」一位一，保持五戰五捷嘅不敗紀錄。
大家睇過「勝得精彩」贏「信心保證」嘅過程，尤如大人同細路仔跑，本來有傳幕後想呢隻馬出戰上周末嘅千四米港澳盃，假如以呢個實力來推論，今屆冠軍「信心保證」可以熱賣到兩倍捧盃，若「勝得精彩」肯跑呢場賽事，呢個盃肯定係囊中物，但馬房無安排隻馬跑呢場盃賽，寧原跑今場千六米，為嘅係前途，假如順利贏埋今場千六米，新一季嘅各大錦標，呢隻馬必屬馬房嘅主攻分子。