潘頓騎得好嘅時候，胯下坐騎真係識飛，但當騎得論論盡盡時，有時會令馬迷十分氣結，好似較早前騎大摩隻「志在四方」，入到直路時，鞍上人見有位唔出，官方評述員賢仔事後更錄咗一條片放上YouTube，再次聲音導航，揶揄一番，不過未幾片段立刻下架。原來事後有人從另一個角度睇，潘頓騎得肉酸有位出或唔出，成一個尷尬場面，主要係輸喺判斷一瞬間，因為只要錯過第一個機會，未必會有第二個出現，有時作為一個太有經驗嘅騎師，可能早段見呢個並非黃金機會，想等一個更佳嘅黃金機會，如用呢個想法，就會理解潘頓跑「志在四方」肉酸嘅原因。今次馬房安排隻馬增程跑千六，放棄同日有過上名成績交出嘅千四米路程，顯然大摩同潘頓已滿肚密圈。今次「志在四方」儘管係嚟港後首戰千六米，但大家唔使懷疑隻馬韌力問題，因為呢隻馬父係「三連冠」，贏過香港一哩錦標，而「志在四方」喺英國出賽時，四戰贏過一場，就係一六九一米，仲有一場二千米得第四名，所以一定適合跑一哩，嚟港前期馬房安排隻馬跑千四米，並非一個適合腳法路程，經過連場熱身賽，馬匹陣上開始走近，難怪經潘頓上場仄準馬匹特性，今仗要向千六米進軍。正如之前普羅馬迷對潘頓騎「志在四方」嘅評價全都係負面，唯獨一些撐潘頓嘅人，指呢件事屬情有可原嘅個別例子，不應抹黑，今次千六米再度用上潘頓嘅「志在四方」，應係還我真面目嘅時候。