■陳柏宇香港文匯報訊（記者 梁靜儀）陳柏宇（Jason）昨晚出席網上直播音樂節目，除獻唱新歌《金草莓》外，又大講爛gag，連他自己都笑指講完也沒人會發笑。說到他差不多每日都同愛女Abigail開Live，開Live 對他來說可謂毫無難度，Jason笑說：「每次開Live都係餵緊佢食嘢，都唔會點理個Live。」之前因老婆出埠要做湊仔公獨霸女兒的他，承認太太回來後女兒也比較黐老婆，不過他就搞笑指自己於某方面較老婆優勝：「我有錢過佢！老婆喺我、囡囡呢段關係中略勝一籌，但同銀行關係，我係略勝一籌，不過老婆同銀行的關係都好好！」
經常帶女兒去旅行的Jason，剛從日本旅行回港，他認為旅行不失為一個培養親子感情的好方法，他已計劃定下一次旅行的地方：「再去泰國，呢啲地方唔會有好勁時差，囡囡比上次已經唔怕熱，但都仲係驚草同游水，可能泳池水凍，但佢好鍾意沖涼。」他突然自爆之前不小心整親囡囡：「擺咗部電話喺架BB車的車頂，跌落去撼到佢個頭，好彩冇整到眼，佢前所未有咁喊，我就前所未有咁抱住佢。」今個周日便是父親節，首次以爸爸身份過節的Jason表示當日不用開工，會同屋企人食飯，問到可會自己買個蛋糕慶祝？他笑說：「都可以，想畀個海綿蛋糕囡囡『奶』吓。（期待佢大個親手整禮物畀你？）冇諗到咁遠，但收到會好窩心，同埋都幾有紀念價值，我會儲起佢。」