上個星期在三日內跑兩次馬，回歸日馬未開場到周三夜馬已排位，相信馬迷都會覺得有啲滯，兼唔夠時間刨馬。對賽馬傳媒工作者更加攞命，既要如常跟進跑日馬嘅臨場同賽後工作，又要同時準備夜馬嘅最新資訊，一日要攪掂哂兩個賽日嘅工夫，真係趕頭趕命做到氣咳，其實馬會日後喺賽期安排時，係咪可以多啲彈性，盡量避免類似情況出現？現時每季有八十八個本地賽日，加埋要預埋啲越洋轉播海外賽事賽期，以及符合七月中至八月底唔跑得馬嘅法例限制，絕對理解馬會編排賽期時，已經冇乜多餘空檔，啲賽期已經密到插針都插唔入，但係賽期編排其實仲有得走盞，首先要識轉彎唔再堅持喺一啲指定假日舉行賽事，農曆初三跑馬已經有好耐嘅傳統，照舊有呢個安排可以接受。不過，家陣五一勞動節同七一回歸紀念日都指定跑馬，就有啲莫名其妙，點解呢兩個日子唔跑馬唔得，呢兩日跑馬方便到最多馬迷，以七一回歸賽事為例，其實係咪可以提早一日安排跑星期日日馬，維持返原本嘅賽序，為馬迷同傳媒提供多啲方便，即使馬會唔想郁動指定公眾假日嘅賽期，咁快活谷夜馬係咪可以壓後安排喺禮拜四跑，過去都唔係冇試過喺禮拜三以外嘅日子跑夜馬，點解編排賽期時就死板或唔敢變通，單係編排賽期嘅思維，就知道負責相關工作人士幾咁離地。老實講，密密跑唔一定係好事，唔夠時間刨馬，自然影響投注信心，馬迷就算買都一定會縮注，啲投注額咪咁樣流失囉。
另一方面，馬會從化馬匹訓練基地一班內地馬伕，因為薪金同補假問題，上周發起罷工行動，馬伕罷工唔係講玩，可直接癱瘓馬房運作。不過，馬會今次反應好快，即刻派高層上去直接同有關員工見面，訂出對方接受嘅解決方案，好快就擺平咗個工潮，內地馬伕亦即刻復工。據知馬會高層知悉從化班內地馬伕決定罷工後，立即指令賽馬事務執行總監夏定安，同兩地馬房營運及馬主服務部主管鄭奇龍，要盡快平息罷工事件。而夏定安同鄭奇龍當晚亦漏夜趕上從化，罷工嗰朝已經回應咗內地馬伕嘅訴求，話會按市場標準檢討馬伕薪酬。今次內地馬伕罷工，主要係唔妥人工同香港派駐從化嘅馬伕有太大距離，亦唔似香港馬伕有得分贏馬獎金，覺得同工唔同酬。本來內地馬伕爭取自己權益並冇問題，不過佢哋人工低過香港馬伕又合情合理，香港上去嘅馬伕全部都有豐富馬房工作經驗，但內地馬伕就係馬會為從化馬場啟用而招聘培訓，之前根本全部外行人，任何工種都係人工同工作經驗掛鈎，冇經驗人工梗係低一截。再講內地馬伕簽約時寫到明人工假期同有乜福利，全部白紙黑字你情我願，入咗職之後又話眼紅資歷高過你嘅香港馬伕，點講都唔通啦。無論如何馬會今次喺管理危機方面確係醒目，出咗問題咪即刻正視，積極搵方法解決，好快就擺平件事確抵讚。