香港無配種事業並非產馬地區，所以馬匹來自多個國家，主要以澳紐為主，當中亦有來自意大利、德國、巴西、日本、南非等地，有啲因為水土問題，有啲就因為質素問題，總之就好難成到材，但有一家品卻係例外，就係苗禮德練返家鄉嘅南非馬，真係好多都發揮出高水準；第一匹令大家有印象嘅苗廄南非精品一定係「獨步青雲」，此駒乃於韋達胯下贏女皇盃的「倫敦新聞」之子嗣，在港唔止交到頭馬，更曾喺香港打吡敗於「爪皇凌雨」得一席季軍，十分威水，至於另一匹馬女「金德寶」在港四勝固然難得，更難得係出戰三級賽洋紫荊短途錦標，撼贏過馬王「蓮華生輝」，更屬經典！前季蕭家軍「創世紀」亦曾在婦女銀袋後上締千八米田草紀錄時間，若非受腳患影響提早退役，相信成就不止於此。另外，枕頭大王許章榮的「馬上發財」，也是實而不華的南非出色PP，在老苗手上六捷，由谷草贏到過大場田草。尚有匹四歲系列賽次關香港經典盃摘冠的「星洲司令」（圖3號），一樣是南非苗近年得意之作，此匹六歲馬上季係唯一能靠近馬王「美麗傳承」半馬位嘅戰駒，唔係吹噓！苗禮德現時在手嘅南非精品，尚有好望角打吡冠軍「雪霸神駒」，又有連場成熱門的「翡翠綠」及兩戰得亞季各一的「歡樂神駒」，老苗新季要省靚自家品牌，大把機會喇！