■關心妍香港文匯報訊 今年關心妍（Jade）重投歌手身份，舉行入行18年首次內地巡唱「Touching Moment Concert Tour」，繼7月於廣州舉行首站後，12月28日將在東莞舉行第二站。
曾兩度踏上紅館的Jade，每次開騷前，都會操到自己最fit，經過一番努力終於操到最fit時足足96磅，日前到東莞舉行演唱會記招，Jade特別揀了一條高叉長裙給歌迷驚喜，但前一日老公陪她fitting時，一見Jade穿上就投訴︰「太高喇！會唔會太性感呀？」Jade只好漏夜把高叉縫上2吋，老公才讓過關！
巡唱第二站，Jade透露邀請了一位神秘嘉賓合唱，她說︰「呢位係音樂才子，為我作過歌，新歌《時刻》佢都有份參與。」東莞站之後，馬上就準備佛山站，明年3月Jade的巡迴演唱會更會走到澳洲和美加，Jade說：「希望巡唱尾站返到香港舉行，好掛住香港嘅歌迷，上次紅館騷已經差唔多相隔7年。」
為慈善不介意母女檔上台
另外，Jade忙於籌備巡唱，亦繼續為「妍亮生命慈善基金」籌款，日前得到音樂團體「Festive Chamber」舉行慈善音樂會為基金捐款，Jade特別在音樂學院「Shining Life Music」挑選7位學生，為音樂會做opening獻唱《Over the Rainbow》。Jade說女兒心心暫時還未敢上台，但這首歌都識唱幾句，過多一兩年後，如果有需要籌款，都不介意母女檔上台；而巡唱第二站會否帶女兒同行？Jade說︰「佢睇完第一站好興奮，今（當）日出發去記招佢都想跟埋嚟，問佢係咪想聽媽咪唱歌？心心話睇演唱會有好多零食，因為上次爸爸帶咗好多佢鍾意嘅食物，心心一邊睇騷一邊食嘢，好似食buffet咁。」