■梁頌恆轉發網民「Lee Yik Yeung」嘅睇法post，暗示佢都「承認」咗老屈警察係事實。 梁頌恆fb截圖口口聲聲「核爆都唔割」嘅「黃絲」，一遇到佢哋所謂嘅「手足」犯事，都一於照屈警察。警方日前喺大埔街頭拘捕「屠龍小隊」槍手期間，就被一班黑衣魔群起包圍阻撓，不斷老屈警員係開槍者，更有泛暴派候任大埔區議員到場盲撐「手足」，質疑警員嘅身份云云。近日就有人喺「香港人連儂牆」facebook開post要求同道中人「反思」，話「唔好再講咩點知係咪警察屈、靜靜雞贏、唔使乜都認」，「唔通我地（哋）係（喺）fb個個話係差佬插贓嫁禍，上到庭可以當證據？」又斥責啲同道中人連口頭撐暴徒都唔夠膽，間接「承認」佢哋老屈警察係事實。而「青年新政」召集人梁頌恆就轉發個post，暗示同意帖文觀點，感嘆「到底我地（哋）完成進化未？」好明顯，高呼「唔分化」嘅「黃絲」內部，𠵱家分化緊喎。
拒認暴徒所為 屈警察「食死貓」
警方就大埔翠屏花園開槍案拘捕18歲男子蘇緯軒，不過警方喺大埔街頭拘捕該「屠龍小隊」槍手期間，遭黑衣魔群起包圍阻撓，不斷「老屈」警員係開槍嘅人，仲有啲泛暴派候任大埔區議員到場煽風點火盲撐所謂「手足」，仲喺網上直播質疑警員嘅身份，令滋事分子更加肆無忌憚阻警執法。亦都有啲仇警網民聲稱「有警員向無辜市民開槍」，甚至用所謂「現場影片」「老屈」有探員將地上手槍嘅指模「抹走」云云。
不過，「出生入死」嘅前線暴徒做咗嘢，但一路都不被自己友「承認」身份，次次都話係警察所為，令一批同路人不滿。其中網民「Lee Yik Yeung」喺「香港人連儂牆」facebook開post，轉發明報一篇「大埔被捕槍客屬『屠龍小隊』」嘅新聞，並發帖叫班「黃絲」「唔好再講咩點知係咪警察屈、靜靜雞贏、唔使乜都認，因為警察落charge上庭告人係唔需要理fb大眾講乜，佢地（哋）咁樣拉得其實已經斷正哂（晒），唔通我地（哋）係（喺）fb個個話係差佬插贓嫁禍，上到庭可以當證據？」之後佢又話：「我地（哋）最需要嘅反而係團結一致勇敢支持佢哋」，畀社會睇到佢哋「真係核彈都唔割」，「就算有人用鎗（槍），都係政府同警察錯，咁樣先係不分化呀！！」佢又再加上「你班××鍾意做神探，但次×次都估錯」、「『手足』搵命搏，你哋就當人同『黑警』『夾埋拍戲』」等標籤。
玻璃心「黃絲」紛護短
不過，選擇性失明又沉迷於臆想嘅「黃絲」就都係唔肯信，當中「Alfred Yu」就留言話「冇理由明明係隻死貓都要『手足』硬食呀嘛。」「Lee Yik Yeung」就回覆指「硬唔硬食唔係我地（哋）決定到，係法庭判，我地（哋）點係（喺）fb帶風向都唔會影響到法庭判決，但你真係覺得手足唔會有槍？有槍就自然有被捕風險，唔通你真係認為可以萬無一失？」
梁頌恆好似都認同網民「Lee Yik Yeung」嘅睇法，噚日就轉發個post，寫住「呢幾個月，口號係『進化』了，從『香港人加油』，到『香港人報仇』。但口號進化既（嘅）同時，到底我地（哋）完成進化未？」暗示佢都「承認」咗老屈警察係事實。咁既然半年來「黃絲」都話明「唔搞分化」，就唔好再係唔係就抹黑警察啦。 ■香港文匯報記者 郭家好