■蔡少芬(左)與陳法蓉(右)跟大家拜年。香港文匯報訊（記者 李思穎）蔡少芬（Ada）與陳法蓉（Monica）趁住新春佳節要一顯廚藝，兩人合力炮製賀年菜跟大家拜年，去年底為老公張晉追仔成功誕下第三胎的Ada已回復狀態，更難得是跟好姐妹Monica首度共同下廚，兩人大煮賀年菜：「萬事如意五福袋」、「招菜進寶黃金蝦」，全程有板有眼，毫無難度，其間Ada更大爆Monica大派「檸檬」拒絕跟他兒子張樂兒上契。
現身煮場的Ada與Monica廚藝純熟，無論洗丶切、煎、炒皆無所不曉，絕對是「美貌與廚藝並重」，當中自誇「煮咩都OK」的Ada，透露閒時經常入廚，就連囡囡返學的飯盒、點心均由她一手準備，但自從兒子出世後，忙於照顧兒子，才疏於入廚；其後，Ada又向Monica「笠高帽」表示：「其實我哋兩個煮嘢都叻，叻喺唔同範疇，Monica蒸嘢好叻！」Monica聞言即沾沾自喜說：「係呀，曾經喺蔡瀾節目，煮過冬菇煀雞，蔡瀾試食後話係佢食過最好食嘅冬菇煀雞。」身旁Ada即神回：「係咪蔡瀾從來未食過咋！」此話一出即全場哄笑。
第一次見蔡少芬讚靚
兩位相識逾20載的好閨蜜是無所不談，提到過往張晉亦曾為Ada下廚時，Ada即問Monica：「你有冇煮過嘢食畀男朋友？」Monica亦大方表示：「一定有，而且我煮一定會好食，因為我用愛心煮，通常都係簡單菜式。」在烹調過程中，Ada竟大爆秘密：「我本身打算契個仔畀佢（即Monica），等佢有條仔，而且仲要係靚仔添，點知佢唔肯，我老公都叫我唔好迫佢。」Monica反擊表示：「點解要契呀？分身家畀你個仔呀？我有好多朋友都有小朋友，好難個個契，而且我又好鍾意你細囡，唔通囡我就唔契，仔就契咩？既然我同你關係咁好，唔使契啦。」
除了「針鋒相對」，其實Ada與Monica亦有晒溫馨的一面，Ada透露當年參選港姐時，曾在髮型屋撞見Monica，這是她們第一次遇見，Ada說：「當時陳法蓉已經係港姐冠軍、雍容華貴嘅大明星，而我只是其中一位參選佳麗，點知轉頭有個髮型師走埋嚟同我講『有人讚你靚喎！陳法蓉讚你！』我開心到幾晚瞓唔着。」