第五場、第三班、一○○○米。大馬主潘蘇通過往所養嘅「事事為王」贏完香港打吡，同年再捧香港盃，之後運返澳洲喺其名下牧場當種馬，近年已有子嗣在世界各地出賽，潘生亦精挑細選「事事為王」嘅子嗣「事事亨通」來港服役，質素一定有保證。「事事亨通」喺澳洲跑咗十六次才來港，在港初出二班直路賽獲取季軍，上場轉來谷草都跑第五，熱身後再來可期幫老竇「事事為王」擦亮招牌。
第六場、第三班、一六五○米。「爸巴閉」父系為早前於紐西蘭劍橋育馬場離世的種馬「藤爵士」，來港前在澳洲昆士蘭上陣，原屬香港馬主擁有的雅士牧場名下，四戰獲得兩冠一亞紀錄，早段速度較慢，走順後具加速力，故兩次贏馬都是後追取得，打仔馬步姿整齊小動作不多，在港初出千二米跑第六輸兩馬位，熱身後上次再戰得第四名，今次越程上一哩正合，誠屬開齋黃金機會。
第七場、第三班、一六五○米。「共創歡樂」乃意大利打吡冠軍，當時以一放到底姿態贏出，性能肯定是匹均速長途馬，來港經過一段時間適應水土環境，加上評分已減至有利水平，近期於谷草中長途賽事已多番跑得接近；上次轉爭田草二千米，鞍上人巫顯東全程狂搶快放，全程無回氣之下豈能不敗，今次重返谷草合發揮得多，馬匹狀態明顯比前更靚，未交代之輩可望扳回一仗。