「中箭（香港眾志）」日前高調賣口罩，結果就連環出事。繼聲稱自行負擔運費但轉頭籌錢後，竟然又出現瘋狂扣數、甚至買唔到口罩都扣人數嘅離譜情況。噚日大批苦主就喺「中箭」facebook留言話明明只係買一盒口罩，最終俾人扣咗成10次錢，又因為「中箭」早前講明「重覆（複）購買者，『眾志』有權不作退款」 ，好多人質疑自己係咪「被捐款」。喺一片聲討中，「中箭」發帖補鑊，將責任推晒畀第三方支付系統，又話可能有人對佢哋網站有「惡意或攻擊行為」喎。「中箭」聲稱預計一星期後會向苦主退款，大家記住睇實筆數啊。
一罩三種價 其實係籌旗
「中箭」賣一次口罩，就整出N個是非。初初聲稱「自行負擔巨額運費，不公開募資」，轉頭就設3種價格「籌錢」，俾人鬧完一大輪，先發現自己網頁負荷唔到花式賣口罩，所以最終先用返最平98蚊一盒出售。不過，好多人就發現根本唔係98蚊一盒，因為佢哋少則俾人扣咗兩次錢，最多就俾人扣咗10次，變咗天價買口罩。
「Marine Juggler」 就話佢個低收入朋友就俾人扣咗7次錢，「不如明碼實價！捐款唔緊要，以（𠵱）家好似被人呃錢咁唔知想點！」「Arthur Chan」就揶揄話︰「唔係呃錢。㩒（撳）錢啫。」「AY Yeung 」就擔心信用卡資料被盜用，「驚不斷收到SMS話授權左（咗）」。
雖然係咁，都有盲撐嘅支持者聲稱「核爆都唔割」，自稱被扣錢10次嘅「吳寶力」就話「報警實比（俾）『藍絲』笑到面黃，」佢感謝團隊搵到口罩，聲稱「make in china（中國製造）都冇問題架（㗎）」，但都忍唔住口話：「甘（咁）即係比（畀）多左（咗）有冇得退錢啊，捐款唔緊要啊，但我赤貧戶，唔想捐10個$98，2個$98都負擔到既（嘅），希望諒解退到8個$98 。」
盲撐者竟叫人咪計較
「KA Fai Li 」仲覺得大家理應被「呃錢」︰「黃之鋒經常幫我地（哋）香港人去『抗爭』，可唔可以將原則暫且放下，少少錢可以幫到你嘅將來甚至乎係你嘅下一代，何必斤斤計較。」
呢啲論調當然俾好多人恥笑同反駁，「Kinki 」揶揄︰「今次（黃之鋒）又可以買層樓。」「man ka yeung 」就話︰「比（俾）人呃完仲幫個騙徒搵埋藉口自我安慰。 」
可能真係會有人覺得98蚊一盒口罩算平，但到底係咪成本價呢？翻查嗰款口罩資料，喺美國賣緊10盒20.9美元（約162港元）至29.99美元（約233港元），平均每盒16.2港元至23.3港元，而同款口罩仲同泛暴派區議員劉家衡噚日免費派發嘅係同一款𠻹。 ■香港文匯報記者 文根茂