■ 泛暴派區議員譚凱邦散佈仇警言論。 網上圖片有錢都唔要，點解會有咁嘅事？咪就係班泛暴政棍俾激進「黃絲」夾到騎虎難下囉。香港經濟喺黑暴同疫情嘅衝擊下，唔少市民都想要一萬蚊幫補下，但班激進黃絲話咁樣會令警察都攞到錢去增加人手同裝備，所以要泛暴派立法會議員反對預算案撥款，仲有人話要藉否決預算案撥款去令政府停擺，實現真正攬炒𠻹。部分泛暴派議員為咗呢啲激進選票，已經決定放棄香港市民可以攞到嘅710億，其他泛暴議員係咪又咁夠薑與民為敵呢？咪放長雙眼睇下囉。
泛暴貪圖激進選票
睇返公民黨早幾日嘅主張，其實佢哋都要求派一萬㗎，到真係有嘅時候又唔要，其實就係為咗顧及激進「黃絲」感受。財政預算案公佈嗰日，唔少激進「黃絲」都想全世界少粒魚蛋，其中「連登」網上討論區就有唔少post都話寧願唔要一萬蚊都要攬炒。
網民「好賤呀！」就開post話︰「要左（咗）就要請多三千個差佬、六架裝界（甲）車，你地（哋）自己簡（揀），我唔×要啦thx（多謝）。」「天水圍迪加」都叫大家唔好宣傳派錢，「大家都知只係糖衣。你攞一萬班『狗』億億聲咁攞，宣傳一萬蚊只會令一般人以為有錢攞但係就忽視左（咗）背後嘅『魔鬼細節』。」「波十三」就話派錢係「奶共保皇既（嘅）政治操作」，又話唔「封關」大家冇命享呢啲錢喎。
雖然普遍市民都支持政府派錢，但班泛暴政棍似乎覺得箍票要緊。除咗公民黨，「新民主同盟」荃灣區議員譚凱邦前日就已經喺facebook出post話︰「若果派一萬蚊是要捆綁裝甲車，我認為寧願全數否決。『義士』上前線，若警方裝備大增，對『抗爭』很不利。這一萬蚊袋左（咗），對不起『義士』。」
區議員散佈仇警論
離島區議員王進洋亦聲言自己一定會反對呢個撥款，但就打定輸數最終都會通過，話鋒一轉就乘機宣傳自己想選超區入立法會，以進一步去攬炒喎。激進到咁，當然啱晒「黃絲」口味， 有啲人仲鬧傳統「泛民」添。「Christina Chan」踩班「民主派」戇居，認為佢哋要表態，「點解仲要俾（畀）錢班『黑警』打『細路』？」
唔少激進「黃絲」都要求否決撥款。「Kwan Shan Fok」認為︰「回水嗰一萬其實係『懲罰年輕人』！然後要加1/4經費俾（畀）Popo（警察）繼續『鎮壓』香港人咁我寧願唔要一萬去換否決預算案！」「Kei Ngai」話︰「攬炒，否決預算案，政府停擺。 唔食人血饅頭！」
雖然呢班人嘅腦迴路同常人唔一樣，但公民黨有咁嘅表態真係唔出奇㗎，分分鐘到時又有衝擊議會嘅鬧劇睇嘞。■香港文匯報記者 甘瑜
