地盤佬好好搵的觀念深入民心，朝九晚六打工仔真係好葡萄。經過了近十年好景，仲會唔會係咁令人羡慕？香港文匯報找來現實中的地盤佬剖析究竟係點？
記者：成日見到報紙寫話成二三千蚊一日，真定假？
工友：真就係真，但係唔多人有囉，地盤有好多工種，又分學師仔（學徒）呀師傅呀，要分當然係扎鐵釘板最好搵，加埋係師傅級都有成2,500蚊一日。
記者：暴動加埋肺炎，地盤工係咪仲有咁好景？
工友：暴動同肺炎當然有影響，仲有𠵱家無咩大型工程，條橋呀高鐵呀都起好晒，仲邊有咁多工程畀咁多人做，單係住宅商業地盤可以養到幾多人，細地盤仔收得十個八個。
記者：無咗大型工程、又有社會暴動，現在重加埋肺炎開唔到工，使唔使減薪？
工友：𠵱家有工開就拜神，仲邊有之前咁年年加薪呢回事，凍薪已經叩頭了，𠵱家已經開始減薪，當日2,400蚊一日，𠵱家減返落去唔夠2,000，有些普通的工人800蚊都已經好難搵。
記者：咁你哋少咗好多消費？
工友：之前有個地盤佬話開工係為愛呀嘛，咁又真。以前同老婆行街佢鍾意件皮褸四五千蚊照買，金鏈、鑽石、珍珠、「金勞」(勞力士手錶)，我老婆多到戴唔晒。仲有同D同行大佬老友食吓飯，餐餐都萬萬聲無走雞。過去消費都好勁吓。𠵱家仲邊有。