借醉行兇呢啲咁低莊嘅招數，唔通連區議員都會用？網上噚日瘋傳前乳鴿沙田區議員麥潤培嘅WhatsApp對話(圖)，內容係「麥潤培」話自己「一定會負責任」，而對方就話「我可以當你飲醉酒，但我唔希望再有下次」，仲話「尋（噚）晚太過份（分），我接受唔到」，「麥潤培」應承會「好好反省」，令網民紛紛猜測佢究竟做錯咩要負責任。香港文匯報記者噚日打電話問麥潤培，佢一開始話「好忙」、遲啲再講，記者10分鐘後再打電話，佢就話已經交咗畀律師處理嘞，但就唔肯回應係咪俾人屈。哦，明白晒。
facebook專頁「泛民可恥行為事件簿」噚日貼出兩張WhatsApp對話截圖，顯示係「麥潤培議員」同另一人嘅對話。第一張係「麥潤培」傳疑似裸上身嘅敷面膜相，對方反問佢「Jm 9（做乜×）」。
對話截圖 「我一定會負責任」
另一張就係「麥潤培」一開頭話「知你回到家我安心了」、「我一定會負責任」，而對方就話「我可以當你飲醉酒，但我唔希望再有下次，以及日後有關公事就用whatsapp聯絡」。
「麥潤培」聲稱「我以後都唔會飲」，對方就講返「尋（噚）晚太過份（分），我接受唔到」，「麥潤培」惟有不停講「對唔住」，又話「唔知點解咁」、會「好好反省」。
「泛民可恥行為事件簿」就話︰「反對派議員飲醉酒對女性做錯事，仲話一定會負責任，大家估下（吓）佢做錯咩。」
網民齊猜謎：係咪做爸爸﹖
網民「劉基」估計：「呢條友有女朋友喎，食完話會負責任，係咪做爸爸？」
「Nanikore Zakka」就認為議員做錯事冇後果：「長毛（梁國雄）以前夠有議員助理，非禮女義工啦。班人恐嚇女義工，所以單案不了了之。」
「Hung Mak」認為︰「又多一隻民主黨淫蟲！」不過麥潤培已經退咗黨，又難怪大家會諗起鴿黨中西區區議員甘乃威當年嘅桃色醜聞嘅。
其實，麥潤培喺2015年區選嗰陣，就試過「一腳踏兩船」，偷食前度俾當時嘅「現任」梁翊婷斷正，𠵱家已係觀塘區區議員嘅梁翊婷，嗰陣都受傷幾深，仲除下鑽戒出post話「走到句點」𠻹。 ■香港文匯報記者 杜思文