■有「黃絲」話俾警察同醫護「恰」，但被「自己友」篤灰，話佢喺醫院鬧事。 Sharon Yue fb圖片「黃絲」成日以為自己可以打橫行。話說日前有「黃絲」喺醫院鬧事，之後竟發帖聲稱自己因為手肘嘅「香港加油」文宣紋身而被警察同埋公立醫院醫護「恰」。故事講得有細節、有人物，極之生動，但被「自己友」篤灰，話佢哋當日根本就係喺急症室用粗口唔停辱罵，更對醫護人員動粗，最後先出動警察調停，而警察亦都客客氣氣做好分內事。有「黃絲」網民感嘆，個個為咗私怨搞到場「運動」變晒質，而有啲人都認識到人要有啲理智，黑白是非唔可以顛倒。
喺手肘內側搞咗好大塊「香港加油」紋身嘅「黃絲」「Sharon Yue」日前喺facebook聲稱自己發生咗家居意外，call白車入咗伊院，包紮後都仲留（流）緊血，輪椅經過嘅地方，「都會留（流）出一條血路。」跟住佢就開始投訴自己被人針對，先係話「一名類似執頭執尾既（嘅）阿姐」，「大力咁擲張濕既（嘅）棉花比（畀）我」，又話「呢位阿姐最後發我脾氣走」，而佢表達不滿後，阿姐就即刻報警，講到自己好無辜。
佢跟住話警察要抄低佢同佢老公嘅身份證嘅時候為難�哋，同埋講晒粗口，暗指警察有心「針對」，之後又話自己被警察同醫護「扯衫」、「不斷將我既（嘅）胸骨大力撞向醫院d（啲）床側邊既（嘅）床架部分」，更故弄玄虛話「之後既（嘅）對白，都無謂逐一打出，大概，呢大半年大家都聽慣聽熟。」
最後，佢話去咗其他醫院處理傷勢，聲稱自己「由診症室行到出口，血路都由診症室拖到出口」，描繪出一場好端端被欺凌嘅故事，更tag「一個紋身受盡委屈」、「無悔」、「香港人加油」、「我呢d（啲）委屈算得係乜」。
自己飲醉酒 向醫護動粗
當然有班唔理事實嘅「黃絲」詛咒辱罵警察，但第二日「黃絲」專頁「急症狂人 Dr Kwong」篤灰，質問「Sharon Yue」點解唔講下自己喺醫院鬧事又對醫護動粗，話好地地睇醫生，「點解會搞到要call保安同警察？一般口角都唔會需要啦，除非病人或者家屬動粗，好激動失控，又或者飲醉酒囉。」事主嘅朋友之後留言確認咗當事人有飲酒。「急症狂人 Dr Kwong」就加多句，「黃藍是政見，但唔保證有良知同人格。」
事發當日喺現場嘅「Alan Chan」都留言，話「Sharon Yue」自己飲醉話整親，但嘈足幾個字又郁手郁腳，本來喺隔嚟（籬）有人自殺先跟住嚟落口供嘅警察入去了解情況，係佢哋自己同警察投訴護士丟綿（棉）花，而「人哋（警察）話忍你好耐，因為你大聲到想整聾人」，佢仲想用手捉住警察，「人哋（警察）本身就客客氣氣，係你自己勁激動先俾人警告唔好有身體接觸。」
不過，事主「Sharon Yue」就狡辯稱，如果佢真係有對醫護人員動粗，點解警察唔即刻拉佢哋，而其他就未有反駁，唔知係唔係失晒底氣。
不斷爆出嘅「黃絲」醜聞，叫啲人感到好灰，「Noah Chan」感嘆，「唉，之後應該點行落去......鬥黃鬧走淺黃，個個都為咗私怨搞到場『運動』越走越遠......」「Kitkit Kit」都認識到「做人幾時都要保持理智！對事非對人！黑白是非不能顛倒！」 ■香港文匯報記者 文根茂