曾錦榮寸社總「保守」 陳虹秀批濫用「本土」「抗爭」
攬炒派喺社福界嘅立法會參選人傾唔掂，香港社會工作者總會副主席張志偉，同本身係社工嘅屯門區議員曾錦榮及九龍城區議員曾健超三人未能「協調」，或將一同參選。有媒體報道話社總俾「本土派」同社福界夾擊，而社總因為擔心無法確認選民身份，終令該界別未能參與戴耀廷「初選」協調喎。曾錦榮喺報道中仲點名話社總立場傾向保守。被控暴動罪、公開撐張志偉嘅「陣地社工」陳虹秀就不點名批評曾錦榮「請唔好濫用『本土』同『抗爭』呢D（啲）字」。社總亦大發牢騷，堅稱社總一向支持「初選」，俾網民笑係「鬼打鬼」。■香港文匯報記者 杜思文
據有關報道指，張志偉、曾錦榮同曾健超喺6月中旬嘗試協調，甚至尋求戴耀廷出手籌辦「初選」，但竟係因為社總認為活動未能百分百確認社福界選民身份。由於遲遲未傾妥，「初選」最後胎死腹中，3人遂敲定各自報名參選。報道仲引述曾錦榮話，「初選」結果雖然可以反映「本土派」獲得支持，但點名話社總「立場傾向保守」，而業界不乏「舊派」選民，自己未必能獲得他們青睞。
陳虹秀喺睇完篇報道就發老脾：「點解我死都唔會參與政治選舉，因為真係可以有人為咗參選而講嘢咁唔負責，對我嚟講，政治實在太黑暗。某人話社總傾向保守，佢有冇check過社總過去4年幾做過乜......」
佢繼續話：「社總係贊成初選，但明明某人都知係嚟唔切加入初選系統，咁唔通參選人自己搵義工，自己搵地方做票站，自己點票咩！反而社工嘅身份點會確認唔到，我哋最方便show張註冊證就得啦！真係激死，係大家傾時某人收唔到，定係某人表達問題，抑或係俾唔知邊份報章嘅記者斷章取義？」
陳虹秀直言：「我從來唔介意君子之爭，但唔該作為社工嘅人都要為自己講嘅嘢負返責任。......請唔好濫用『本土』同『抗爭』呢D（啲）字，唔係用把口講，係用實際行動，仲有請做好Fact check，做一個負責任嘅成年人。」
陳虹秀fb挑機 曾健超冇理
佢仲喺曾健超fb留言，問點解佢唔要求有關嘅傳媒澄清返，「如果係記者誤會咗你嘅意思，你應該解釋返社總係贊成初選，社工有註冊證，做認證都唔難，最困難係搵人做第三方，......你明明知戴耀廷同你講處理唔到社福界嘅初選，又搵唔到人去做第三方，咁先不了了之，但記者講另一個版本。如果記者屈你，識咗你都4年，你真係要澄清吓！」不過，曾健超就冇理佢。
梁傳孫暗諷戴耀廷無公信力
自稱係「初選」協調者嘅社總理事梁傳孫，其後喺社總facebook發長文回應話，有關報道「完全失實」，稱社總由始至終樂意參與「初選」，且三人均贊同舉行「初選」，只因未能搵到「有公信力及執行能力」嘅第三方主持，「初選」安排唯有作罷。咦，咁即係話戴耀廷冇公信力同執行能力？
梁傳孫又話曾健超曾與戴耀廷聯絡，戴稱因時間關係，未能在「初選」中加插社福界。曾錦榮提議用租用電腦系統及設置網上問卷平台，以登記及核實選民資料嘅方案，梁傳孫回覆話首要找到具公信力和執行能力的第三方，此後三方再沒有進一步商討。
網民「Yu Hin Ng」就「苦口婆心」道：「其實我好擔心，可唔可以真係協調，求下你地（哋）啦......隨時就係差呢一席。」「陳大文」一句踢爆社服界係「鬼打鬼」，寸佢哋話：「其實你地（哋）吾（唔）洗（使）寫咁長篇文章，邊個會咁得閒同你慢慢睇。一句講晒（鬼打鬼）。」