■《蘋果》認訂閱急跌，其實紙版都少人理。圖為便利店《蘋果》山積。 資料圖片《蘋果日報》之前乘壹傳媒集團創辦人黎智英（肥佬黎）涉嫌違反香港國安法及串謀詐騙等罪被捕之機，大印報紙搞到好像很受歡迎。點知過咗幾日後壹傳媒股票暴跌，報紙亦開始滯銷，噚日《蘋果》更喺facebook上發布一段肥佬黎受訪嘅短片，內容講到《蘋果》用戶訂閱量一年間跌咗成四分一，加上《蘋果》登咗全版報招廣告，就令之前所謂銷量爆棚同好多人支持嘅假象不攻自破。
《蘋果》噚日喺facebook上發布一段肥佬黎受訪嘅短片，附文指今年9月2日係踏入《蘋果》訂閱一周年，並稱《蘋果》轉為訂閱制嘅期間經歷咗唔少風雨同「面對各方打壓與威嚇……《蘋果》依然無畏無懼，繼續堅持揭露真相。」 肥佬黎則喺條約3分鐘嘅片入面講到，香港國安法令《蘋果》同事嘅壓力好大，因為佢哋要顧及自己嘅安全，「用良知同對社會嘅責任去做呢份工」云云。
之後，佢又承認《蘋果》嘅訂閱量不斷下跌，「多謝香港人朋友大力支持，甚至用股票作抗議，我覺得去到最後，我們能維持就是靠訂閱，一年間從開始到現在跌了四分一以上（用戶）……由80幾萬跌到得60幾萬，咁多人離開係反映到我哋嘅內容唔足夠去吸引或保留佢哋……」，即係所謂多人支持都係有疑問啦？
廣告量告急 倒貼少人理
除咗肥佬黎呼籲人訂閱《蘋果》外，噚日《蘋果》都登咗成版廣告，叫「黃色經濟圈」嘅「黃店」喺《蘋果》落廣告，並聲稱推廣期間一個月免費，甚至會喺報紙刊登同發放300次電子廣告。但最誇張都係寫明《蘋果》會幫手喺廣告嘅相同影片度加旁白，雖然得5秒，但都顯示出《蘋果》嘅廣告量非常告急，否則都唔會倒貼到呢個地步，只為吸引客源。
《蘋果》呢套伎倆一早俾人睇穿咗，唔少網民都表明唔會支持，「Siuwan Yam」話「撐你老×，快D（啲）判罪執笠！」「Raymond Hau」直言：「《蘋果》係毒品喎，少睇一日都唔得㗎。」「Eric Leung」質疑肥佬黎掠夠水未，「股票吸到足夠錢未？」■香港文匯報記者 郭家好